Header Image

中西區響呢十幾年變咗好多,好似每隔半年就會有一次大轉變。呢種改變唔單只俾我感覺到歲月嘅流逝同時,都俾我知道,呢個世界上有好多嘢都響度慢慢咁改變緊。可能再過多十幾年,當我再去中西區嘅時候,已經認唔出呢個陪我成長嘅地方喇。

 

呢個禮拜趁住大學仲未開學,我決定去中西區度行,再次感受中西區嘅文化氣息同當初留俾我嘅記憶。

 

胡叔

 

呢一日,我再次黎到了見證住我成長嘅小學。望住米白色同綠色相間嘅外墻,摸住啡色沉重嘅大門,突然間好多腦海中嘅回憶一下子飛曬出黎。呢間小學留俾我嘅回憶實在太多喇,唔可以一一詳述。但係,呢間小學有一位人物實在令我非常欽佩。呢位人物唔係小學班主任,亦都唔係其他小學老師,而係一位校巴司機-胡叔。

 

胡叔係一位專門負責西環線嘅校巴司機,佢同佢老婆一直服務於西環線。仲記得當初我第一日搭校巴嘅時候,校巴上冇曬其他位。因此,我只可以坐響司機位隔離嘅長凳。小學時候嘅我最鐘意坐長凳,因為長凳係唯一一個位置可以望到前面嘅道路情況。呢種感覺對小學生黎講,真係好得意,好似每次自己都係做緊司機咁。

 

宜家諗翻起,其實當初一年班嘅我自己坐都係好事。因為萬一身邊嘅同學係高年班,好多時候都好容易俾人蝦。此同時,正因為呢個位置都拉咗我同胡叔胡嫂之間嘅距離。

 

由於我細個住嘅地方同學校都有少少距離,所以放學嘅時候我都係最後一個先翻到屋企。雖然每日放學都係最後一個翻到屋企,但係當初嘅我冇因為咁而唔開心。因為一翻到屋企,就代表要開始做功課同溫書。特別係考試嘅時候,我唔想咁快翻到屋企。因為每次考試都考得好差,早啲翻到屋企就代表早啲俾人鬧。因此,考試時期搭校車,我個樣都會唔係好開心。

 

可能胡叔都察覺到我個心情,所以當其他同學落曬車嘅時候,佢就會同我傾計。佢每次嘅話題唔係鼓勵我努力讀書咁簡單,而係傾我最近睇緊咩卡通同玩緊咩玩具。雖然佢對我嗰陣啲卡通同玩具唔係咁熟悉,但係佢都會好耐心咁樣聽我介紹每個卡通人物嘅性格。

 

每次同佢傾計,我都有一種好開心嘅感覺。因為我真係感覺到自己嘅壓力會少咗好多。因此,我每次都好鐘意放學嘅時間同胡叔傾計。而胡嫂呢,佢就會負責同我講讀書嘅事,佢成日都鼓勵我努力啲讀書,將來就唔會走咁多彎路。因此,每當我有咩壓力同佢哋講,佢哋都會比少少建議我。胡叔同胡嫂響心理層面上幫咗我好多,令到我對翻學冇咁反感同焦慮。

 

陳爺爺

離開小學,我黎到咗細個好朋友嘅屋企大廈門口,又一次啲回憶湧曬出黎。我細個有個好朋友,我同佢係響校車上面認識嘅。本來我哋兩個唔係同一班,但係都因為同一架校車而變成好朋友。我同佢每次放學響校車都會玩得好癲,就好似校車係我哋兩個專屬遊樂場咁。甚至有好幾次,胡叔同我哋講,如果再係咁就會講俾主任知!。但係我同佢都係冇理胡叔,成日都響校車度周圍玩。

 

每次到暑假嘅時候,我都會去佢屋企玩電腦遊戲。佢係同佢爺爺嫲嫲一齊住,所以久而久之,我同佢爺爺嫲嫲都開始熟絡。每次去到佢屋企,都會同佢爺爺嫲嫲傾計,傾最近讀書讀成點樣同埋對將來有咩目標。雖然每次傾計時間都唔長,但係每次都感覺到佢哋對我嘅關心。

 

更加令我感動嘅係,每次去佢屋企玩嘅時候,佢爺爺都會煮魚蛋粉俾我哋兩個作為下午茶。我曾經問過陳嫲嫲,「點解每次下午茶都係魚蛋粉?」佢話我知,因為陳爺爺第一次煮,問過我鐘唔鐘意食。我當時講咗「好鐘意」。所以,每當我過去玩嘅時候,陳爺爺都會特登去街市買魚蛋同河粉。聽到呢句,我當時真係好感動。我完全冇想像過,原來呢個世界上除家人親戚之外,仲會有人對自己咁好。

 

可惜嘅係,因為某啲原因,我同胡叔同埋嗰位好朋友失去曬聯絡。呢十年,我冇佢哋冇任何交集。宜家諗翻起,呢件事的確係一個遺憾。如果有一日響街度撞翻佢哋,可以聽翻佢哋呢十年嘅故事就好喇。

中西區就係一個令我咁著迷嘅地方,令我最著迷嘅唔係中西區年代久遠嘅建築物,而係以前香港嘅樸人情味。