前區議員助理李譯喬工作時錄音隨時交予政府 兩區議員流亡海外 |丁樂婗|李譯喬

前深水埗區議員劉家衡、李文浩流亡海外,早前佢哋嘅議員助理李譯喬指控劉家衡拋棄助理自行逃亡,令到李譯喬須獨自面對襲擊藍絲嘅罪名,被判入獄半年。不過,據李譯喬太太丁樂婗透露,原來李譯喬工作時暗中將對話錄音,準備隨時交予政府。

丁樂婗喺昨晚(1號)嘅社交網站公開帖文透露,前助理李譯喬喺入獄前交予佢幾段錄音,包括指示議員辦事處同事「偽造」辭職信去領取區議會津貼。丁樂婗仲話:「呀錄音呢我就唔放住啦,費事陣間啲留係香港嘅人俾廉署搞就唔好啦」有人喺帖文附和話:「如果佢地屋企人無走,可以報狗/郭安,亦可揾大公/文匯,佢哋一定會揾佢地屋企同身邊人公民黨呃funding,內亂陷害手足,一定上頭條。」

面對錄音威脅,前議員李文浩翌晚喺社交網站回應指:「我人已經唔係香港,你亦都唔會威脅到我啲咩,做嘅嘢都係為咗對抗中共,我問心無愧。

李文浩又質疑喺工作期間錄音牽涉誠信問題:「做議員助理,我唔知佢將來會搵咩工,但如果將來嘅老細知道佢返工係鍾意錄音嘅,真係冇影響 ?」佢又指斥李譯喬等人私怨上腦:「寫信畀唔同國家,走去用前助理身份舉報人哋,抹黑人哋收共產黨錢同埋係共諜……你哋咁做會唔會過份咗少少呢,我唔介意你好憎佢,但係我介意你捏造證據。」