海外港人註冊成立美國非牟利機構「華粵學院」 正物色校址傳承正體字廣東話文化

隨住好多香港人移民海外,如何喺傳承同宣傳廣東話都係海外港人嘅關注。華粵學院(Institute of Chinese And Cantonese NPO,英文簡稱ICAC)宣布已經喺美國註冊為非牟利機構,並且喺今年1月1號開始運作,希望可以保護、傳承正體字同廣東話文化。
華粵學院喺介紹話,粵語一直喺香港、廣東地區以至馬來西亞、越南、英國、加拿大同美國嘅華人社區普遍採用。佢哋計劃聯繫所有相關組織,竭力把粵語同正體字呢兩項寳貴語言文化遺產保存、推廣同傳遞下去;又話中國大陸將普通話同簡體字變成官方語言後,正體中文同粵語遭受打壓;越來越多華人、廣東人及香港人被逼離鄉別井,號召保護同傳承正體中文與粵語,實在有燃眉之急。
華粵書院話係由一班流散港人發起,出錢出力組成喺美國註冊嘅非牟利組織!初步計劃項目包括募捐正體及粵語書同影音,送贈美國同其他國家;物色校址作實體教學同推廣活動之用;為各教授華粵的老師提供宣傳及教學平台嘅中介平台。
佢哋希望各地港人都可以捐贈金錢、物資、書本及影音、成為董事、會員、義工等。可以喺Facebook 群組 「華粵學院」了解佢哋嘅最新發展同資訊。