浸大:政府獲得接種者知情同意 沒有強制市民打疫苗 同時下周起未接種兩劑者不准進入浸大校園

疫情期間都出現好多假新聞,因此香港浸會大學近年成立嘅「事實查核中心」都經常需要核實社交網站嘅熱門貼文,話要辟除謠言。但最近「事實查核中心」就指責一篇指控「香港政府強逼市民打針」嘅網上帖文錯誤,認為所有打針嘅人都簽過「知情同意書」;但有醫學背景嘅中文老師指出,「知情」並不等同「自願」,「事實查核中心」混淆咗兩個醫療倫理概念,講法會誤導市民。

「事實查核中心」引述「雪行者2」上個月嘅帖文話:「紐倫堡條約第六章第三節『任何政府不得未經個人同意下強制或強迫進行醫療。』好多政府已經違反紐倫堡條約,之前違反嗰啲人要打靶,而家違反嗰啲都會係⋯⋯」中心指出,《紐倫堡原則》並沒有分章節,因此唔存在原帖文所講嘅「第六章第三節」,最多只係話「以人體為試驗對象時,事先徵得參與試驗者嘅自願同意,乃絕對必要嘅條件。」。香港政府做嘅唔屬於臨床試驗,唔應該用《紐倫堡原則》混為一談。

中心又引述香港政府為接種者準備嘅知情同意書,指出目前香港供應嘅科興及復必泰新冠疫苗喺試驗階段已取得受試者嘅事先知情同意,兩款疫苗喺接種前同已告知接種者相應嘅風險,並獲得接種者同意。因此原帖文所稱嘅「強制醫療」並不符合事實。

但修讀過生物醫學、從事中文教育嘅Ken Sir就反駁話,中心列舉政府嘅「知情同意書」,最多只係話打針者事先聲明知道疫苗嘅風險,唔可以用嚟證明佢哋係自願抑或被逼打針。「浸大而家要打夠兩針先可以返學上堂,政府又話24號之後打咗針先可以走入食肆、體育館及學校。先唔好講咁樣做係好係壞,咁樣都唔算逼人打針咩?」

浸大公布,因應疫情加強防疫措施,下周一(10日)起,入校師生、教職員、承包商或到校逾4小時嘅訪客,須打齊兩針滿14天(未成年者則可打一針復必泰),或持7日內嘅陰性檢測證明。

#浸大事實查核中心 #浸大 #hkbu #打疫苗  #打針 #知情同意 #強制打針 #醫療倫理 #kensir #港語學