理大校董會主席建議城大理大浸大搬去海洋公園 合併成「超級大學城」

隨住旅客減少,海洋公園面臨財困危機,香港理工大學校董會主席林大輝喺今日(11號)嘅報紙訪問提出,結束海洋公園營運,並將香港理工大學、香港浸會大學及香港城市大學搬入海洋公園現址,興建一個「超級大學城」。

林大輝話,海洋公園「已經完成歷史任務」,但與此同時本港大專教育正不斷發展,三所大學因為校園面積唔夠,發展受限,因此建議搬去海洋公園興建一個「超級大學城」。而九龍塘及紅磡嘅大學現址,就可以改劃做商業或住宅用途。

林大輝又話,雖然海洋公園對於本港旅遊界嘅貢獻相當大,港人亦緬懷園方昔日嘅光輝,惟隨着本港融入大灣區發展,海洋公園嘅發展已大不如前,形容公園「已完成歷史任務」,故該用地可改作其他用途。

佢又話,本港三所位於九龍嘅大學(理大、浸大、城大),校方均希望在學術上有所進步,惟同時面對土地不足嘅問題,即使校方希望增聘教授,亦未能提供額外嘅實驗室等設施,致未來嘅發展受到限制,亦未能為學生帶來最理想嘅環境。他以理大為例,現時位於紅磡嘅本部校園,範圍已經固定,附近一帶難以尋覓其他用地,搞到學生宿舍要起喺何文田,四年嘅大學生活,校方只能保證有一年可入住宿舍。

現時三所大學佔地面積約五十公頃,如果搬入面積達九十公頃嘅海洋公園現址,校園面積就可以「翻一番」,亦可收取更多學生。而且由於三所大學遷入同一範圍內,故未來將有大量設施可以共用,例如不同種類嘅運動設施,以及出入校園嘅道路等,有效運用資源。佢建議,特首候選人應該將呢樣嘢納入政綱。

財政方面,佢認為政府可將三校用地改劃為商業或住宅用途之後,就可以將三幅地出售,部分地價用作興建教育城開支。佢又覺得今次建議可解決教育、旅遊業、土地不足嘅問題,屬多贏方案,惟現時純粹個人建議,冀今次拋磚引玉,可得到社會進一步討論。佢形容:「政府好聰明,如果政府或教育界覺得呢個方向好,可以諗下。」

#海洋公園 #浸大 #理大 #城大 #超級大學城 #浸會大學 #城市大學 #理工大學 #香港浸會大學 #香港理工大學 #香港城市大學 #大學生 #大學宿舍 #大學教育 #浸大山神 #港語學