【港語學綜合報導】美國史丹福大學之前因為財政問題，裁減廣東話課程嘅人手，引起師生同當地港人嘅關注，最終喺聯署下都成功保留，最近仲迎來一個好消息。當地保育團體Save Cantonese就宣布，得到由廣東話母語人士成立嘅美國食品供應商S.J. Distributors承諾，會捐款100萬美元（約780萬港紙），支持史坦福大學嘅粵語課程。

嚟自香港嘅、S.J. Distributors嘅首席執行官孫振豪（Scott Suen）就話：「我哋唔係叫小朋友唔好學普通話，但我哋想保留粵語文化。我哋希望想講嘅人可以繼續講，俾佢哋有自己嘅選擇。」佢又話，感到年輕一代中講同學廣東話嘅人都越來越少。佢母語係廣東話，所以唔希望呢種語言滅絕。「如果你想保護佢，就需要有人願意保持呢種交流方式。我哋既然有能力可以做啲嘢幫手，而家正係時候。」

佢又認為語言係文化嘅載體，廣東話流傳至今，保留咗大量古漢語嘅發音、詞彙、語法，可見佢文化底蘊嘅深厚。相信如果可以對呢個項目做出長遠支持嘅話，可以多一舍渠道幫到嗰啲喜愛粵語文化、對廣東話感興趣嘅人。」

Save Cantonese領導人譚珍兒博士十分感謝S.J. Distributors慷慨支持：「當S.J. Distributors同我哋聯絡表示話願意捐錢嘅時候，我哋嘅激動之情難以言表。我哋成個團隊就咁夢想成真啦 。」團隊另一位領導者Maciej Kurzynski亦都表示有同感：「我哋咁激動係因為S.J. Distributors同我哋對未來有共同嘅展望：希望廣東話可以作為一門現代化而又充滿活力嘅语言，繼續有得咁樣教。」

正如譚珍兒博士強調話，團隊跟住落來仲有更多嘢需要做，但與此同時呢一筆100萬美元嘢捐款為農歷新年又增添咗一份快樂：「我哋同S.J. Distributors一齊迎接虎年嘅來臨。我哋對於佢哋嘅慷慨捐贈表示深深嘅感謝。呢筆捐款為史坦福大學嘅粵語語言教學作出咗巨大嘅貢獻。」

S.J. Distributors係一間全球性嘅食品供應商，專注為各地地區提供亞洲嘅生鮮食材及膳食。呢間公司由廣東話為母語嘅人士創立，而佢哋嘅捐款可以支持一間頂尖大學嘅粵語語言教育。

 

聯絡人：Jamie Tam 譚珍兒 / SaveCantonese.org / SaveCantonese@gmail.com