解放軍新聞傳播中心日前罕有咁上載咗一條全廣東話嘅宣傳片，呼籲廣東子弟入伍解放軍，引起網民關注。有廣東網民不滿被稱呼為「廣東仔」，亦有其他網民不滿解放軍只為廣東地區特別出粵語版：「每個省都有方言 為什麼偏重粵語？」

片段由廣州市人民政府徵兵辦公室製作，用粵劇唱出一句「百年未有之大變局」開頭，鏡頭轉到茶樓入邊，講廣東話嘅解放軍老兵同其他茶客講，解放軍嘅男子氣慨，比得上廣東嘅醒獅、拳術，呼籲廣東子弟應徵入伍。「我哋䟴䟴腳喺度飲早茶，其實係我哋背後，有好多人搏晒命幫我哋撐住。」

此外，短片亦出現諸多廣東元素，包括有廣州塔、國立中山大學等地點，以及粵劇、舞獅、功夫等廣東傳統文化。

有大陸網民都好支持當局支持：「居然仲有粵語啊！正！」「又真係幾接地氣嘅」「粵語真係好好聽」有廣東人認為影片標題「廣州仔」稱呼有欠尊重：「廣東仔？你試下我叫你北京仔丫？想人當兵唔該尊重d吖！」亦都有人質疑點解會用廣東話而唔係普通話去拍：「每個省都有方言，你不出個幾十個？為什麽粵語就要單獨來？」「那還推廣普通話幹什麽？以後出不出其他語言的？」「這麽招兵，招進去再搞個粵語連？」

#解放軍 #廣東話 #廣東人 #廣州市 #宣傳片 #徵兵 #港語學