教育工作人員總工會呼籲推遲DSE及取消小學呈分試 並停止中六備試嘅面授課程

近日本港疫情個案上升,政府喺社區採取更多措施之餘,有團體對教育政策都獻上辣招!工聯會屬會教育工作人員總工會以公開信向政府提出多項建議,呼籲教育局立即暫停中六級學生回校面授課堂,考評局推遲中學文憑試開考日期,以及延長各級中、小、幼學校暫停面授課堂嘅日期,直至疫情緩和。

教總又建議,教育局應取消小學六年級下學期呈分試,以減少家長、學校與學生面對呈分試嘅壓力;考評局則應考慮取消全港性系統評估(TSA)中嘅說話評估。教總呼籲全港小學取消三月、四月嘅校內考試,全港學校應跟隨特區政府呼籲,推行員工在家工作至另行通知。

另外,法團校董會與校長喺教育局宣布停止面授課堂期間,安排老師、職員、校工回校當值嘅安排上,應考慮員工嘅安全,以減低員工受感染嘅風險為首要條件,以免疫情擴散。

目前香港中小學因為疫情須暫停面授課至本月21日,轉為線上教學(俗稱Zoom教學),但中六由於要備戰中學文憑試,可獲豁免。教育局對有關建議未有回應。

#教育工作人員總工會 #教總 #DSE #文憑試 #中學文憑試 #校內考試 #中六 #中學 #小學 #幼稚園 #香港教育 #港語學