香港法庭裁定叫人「鬼佬」冇貶義 被炒工程師告禮頓歧視敗訴

禮頓建築外籍前僱員於2018年入稟區院,話佢俾人一連串敵意歧視俾人炒,例如俾人叫做「鬼佬」,又架空佢工作。

 

案件上年11月終於開始審訊,法官歐陽浩榮噚日(11日)頒布判詞裁定敗訴。法官話,鬼佬呢個稱呼喺華人社會好普遍,而且單純咁稱呼佢都唔算歧視,認為係申索人喺工作溝通有問題先俾人炒。

 

原告Francis William Haden喺2016年喺將軍澳藍田隧道項目做爆破工程經理,Francis話做嘢嗰陣多次聽到有人叫佢同其他外籍員工做「鬼佬」,又喺上司嘅助手口中聽到話中國建築有人質疑,點解有咁多「鬼佬」參與工程,於是佢之後就俾人架空,睇唔到工程資料。

Francis嘅舊同事就作供話,原告嘅工作能力無問題,但就令同事覺得佢難以合作。

 

同事又話Francis對中國建築嘅員工有偏見,搞到組員有時都會兜過原告,直接同原告嘅外籍上司索取指示。

 

法官歐陽浩榮喺判辭話,無任何紀錄顯示有員工叫佢做鬼佬;單單以「鬼佬」稱呼不構成種族歧視,即使喺職場上使用,都唔一定帶貶義;決定解僱申索人的4人全部都唔係華人;申索人嘅指控源於感受,未必真確,反而佢可能過度詮釋人哋嘅說話。

 

此外,Francis嘅外籍上司都作供話,自己有時會自稱「鬼佬」。所以最後法官裁定申索方未能證明在工作環境出現種族仇視或歧視。

#鬼佬 #外國人 #廣東話 #鬼仔 #鬼妹 #外國鬼 #香港人 #香港法庭 #香港法官 #歐陽浩榮 #港語學