美國拯救廣東話運動 贏得三藩市城市學院董事會支持營辦廣東話課程

舊年三藩市城市學院(CCSF)董事會縮減預算同裁員,當地學生憂慮會刪減廣東話課程,因此發起「Save Cantonese at CCSF」運動,多次遊行請願爭取保留廣東話課程。近日城大董事會董事會一致投票,贊成通過「支持營辦高等教育廣東話課程」嘅決議。

「Save Cantonese at CCSF」發言人話,雖然得到董事會支持,但喺 CCSF 都未確保廣東話課程嘅未來,佢哋會睇住 CCSF 廣東話課程嘅變化,拯救粵語嘅運動尚未結束。

發言人又話,決議表達咗公眾希望有個可持續嘅廣東話課程。因為廣東話班現時不受公帑資助,會好似舊年咁好易受到財政影響,所以希望通過呢項決議,等學校高層優先考慮同資助廣東話課程。

「Save Cantonese at CCSF」仍然爭取緊CCSF 有蓬勃發展嘅粵語課程,目標係將廣東話班納入 16 個單元、符合資助條件嘅證書課程同全職嘅粵語教師。雖然廣東話課程一直滿額,但CCSF都只係得一個廣東話老師,而且仲要係兼職。佢哋會睇住管理層遵循董事會嘅指示,逐步發展當地嘅廣東話教育。

#舊金山 #三藩市 #廣東話 #廣東話課程 #美國廣東話 #美國粵語 #粵語課程 #粵語 #港語學