中央抗疫專家組抵港 官員透露共同技能:全部都識廣東話

早前政府司司長李家超喺深圳召開記者招待會,預告香港同大陸專家會組成「專班」共同制定抗疫對策。噚日內地支援香港抗疫流行病學專家組已經去到深圳,即將起行赴港。疾控局官員透露,專家嘅共同技能就係識得英文同廣東話。

疾控局一級巡視員賀青華透露,4名專家都來自廣東,流行病學調查經驗豐富係熟練掌握粵語同英語,熟悉香港社會,未來隨時可根據香港實際需要調配全國各地嘅專家支援。

其中康敏、陳純同陳雪琴係國家流行病學調查專家組成員,楊韜慧就會擔任專家組秘書。康敏係廣東省疾控中心傳染病預防控制所所長、陳純係廣州市疾控中心疾病控制主任醫師、陳雪琴中山市疾控中心應急管理部主任、而楊韜慧就係廣東省疾控中心辦公室科員。

國家衛健委副主任、國家疾控局局長王賀勝會見專家組時,傳達中央全力支援香港抗疫嘅要求,寄望他們早日完成任務,平安歸來。疾控局副局長孫陽表示,專家組任務十分艱巨,首先要盡快摸清疫情情況,做好分析研判,為幫助特區穩控疫情提供專業意見。

#李家超 #抗疫專班 #抗疫專家組 #香港抗疫 #內地支援 #大陸醫生 #深圳衛視 #國家衛健委 #廣東話 #英語 #港語學

1 1 vote
Article Rating