政府3.1萬高薪直接聘用大陸照顧員 羅致光透露唯一要求:「識講廣東話好重要」

政府日前都講過,社會福利署會喺內地直接聘用1000名臨時合約照顧員,以紓緩院舍因為陸續確診而導致人手短缺嘅問題。勞福局長羅致光噚日喺商台節目透露,首批照顧員2至3天內到港,到隔離設施或暫託中心提供支援,當局會提供3天訓練,主要聘用條件之一是「識講廣東話」,照顧員底薪連津貼每月約3.1萬元。

羅致光表示由於情况相當嚴峻,人手空缺率已達25%,早前就話已經聯絡大陸嘅勞務單位招募照顧員,到社區隔離設施及院舍照顧染疫長者。佢話,雖然薪酬達3.1萬港元,冇學歷或資格要求,只係需要「識講廣東話」,但由於本港疫情嚴峻,招募仍然都有一定難度。

勞福局又喺噚日起放寬「補充勞工計劃」,容許護理業界喺大陸輸入護理員。局方又喺facebook呼籲求職者轉投安老服務業,舉例話而家個人護理員嘅基本月薪有1.4萬至2萬元,如果計埋津貼,月薪都可能有3萬元。

#廣東話 #羅致光 #護理員 #照顧員 #大陸人 #香港人 #就業機會 #政府招聘 #港語學