因病缺席可否攞到5**?中學校長會主席建議「特事特辦」

中學文憑試(DSE)繼續會喺4月22號開考,林鄭月娥噚日話稱「仲有少少要考慮」,應變方案係最遲5月開考。中學校長會回應話,4月22號如期考係對考生最有利,再改會增添佢哋壓力;亦都建議參考舊年做法,喺竹篙灣檢疫中心設置特別考場,俾有檢疫令嘅考生應試。另外,校長會主席連鎮邦校長就話,應該探討「特事特辦」,俾缺席考生有機會攞到5*、5**。

現時考評局萬一考生因各類疫情因素缺席考試,不設補考,但可申請「科目評審成績」,但最高只係得到第五級(相當於會考嘅C),對於本身備戰充足、有心有力拎5**(相當於會考A)嘅同學嚟講可能有欠公允。連校長話,今波疫情嚴峻,考生染疫機率比過去兩年高,認為可探討喺評分上特事特辦,喺專業公平嘅機制下,俾缺席考生有機會攞到5*、5**。

中學校長會一方面寫文向政府爭取考生權益,另一方面都喺文章勉勵學生話:「別再分心去思考文憑試是否還有變數了!正如無人能預測疫情會否突然再轉好或壞。集中精神,保持自己身心健康,按個人能力好好温習。也可以試試退一步想:困境,或許便是人生必經的試煉。再難的路,也有出路。」

#dse #文憑試 #考試 #公開考試 #公開試 #疫情 #校內評估 #唔公平 #香港教育 #港語學 #中學校長會

0 0 votes
Article Rating