「見字飲水」近年成為新興潮語，喺20年仲登上Google香港十大搜尋詞，可謂風頭一時無兩。呢句說話喺疫情期間，更加有好多香港人喺唔同場合用嚟互勉，勸大家亂世中注意健康，多多保重。不過，以後店舖用呢個四字詞，可能都要先同「原作者」溝通返。事關近日有廣告業人士發現，原來呢四隻字已經成為有限公司嘅註冊商標，未問持有人就使用商業宣傳可能有侵權之虞。

港語學翻查知識產權署登記資料，發覺有關講法屬實，「見字飲水」四字原來係註冊咗做3個商標，均由Valkyrie Agency Limited持有。廣告人Stephen Chung今日（24號）喺社交網站表示聯絡咗有關公司以及相信係持有人嘅「見字飲水協會」，表示業界擔心「喺商業廣告/social post 入邊。係需要你哋批准先用得？」佢又質疑一個如此普通嘅講法，點解可以申請成為商標；同埋「見字飲水協會經常都使用電影配圖、meme相去謀利，亦都冇畀過錢其他版權持有人。

「見字飲水協會」好快就喺帖文回應話，「phase簡單唔代表唔係創作，你可以簡單google可以搵到創作者同出處」。「協會」又引述林日曦《見字飲水》歌曲都有鳴謝「協會」，「我出咁多po 搞咁多合作推咁多野的話，做廣告業既都唔好再話客唔比budget，因為大家心目中創作既時間同心機係共產的」。

除咗廣告業界擔心會侵權之外，有啲市民就認為呢種將互勉用語註冊成商標嘅做法令人憤怒。藝人王宗堯亦都引述帖文質疑：「咁 #香港人加油，#見字飲奶 得唔得」。王宗堯提到2019年盛傳有人註冊Pepe蛙去控告其他二創嘅抗爭Pepe蛙一樣，直斥：「呢啲叫做 #忘本」

「見字飲水協會」回覆網上留言時，承認已於兩年前申請註冊商標。該專頁回覆另一Instagram專頁「hkpr_memes」查詢時，更指：「不論是否商業行為，想使用的話需要聯絡我地（哋）合作。」

 

#見字飲水 #見字飲水協會 #註冊商標 #侵權問題 #潮語 #廣告業 #香港廣告 #廣東話 #港語學