如何釋除國安法疑慮?考評局公布示範答案:「該疑慮不攻自破」 引用資料「金融市場保持平穩、運作有序」

香港中四及以下嘅學生今個學期起,唔使再讀培養獨立思考嘅「通識科」,轉為讀「重視培養學生的正面價值觀、積極態度及國民身份認同」嘅公民及社會發展科(簡稱公社科),而且呢科唔會計分,不過喺公開考試都會有「達標」同「不達標」之分。何謂達標呢?考評局最近就公布咗《學生表現示例》畀大家觀摩。

之前考評局已經發布咗樣本試卷。其中一條比較注目嘅題目,係「就營商環境而言,指出部分人士對國安法的實施可能存在的一個疑慮……」以及引用資料回應「如何釋除該疑慮。」試卷提供嘅「報章資料」就話「香港的金融市場保持平穩、運作有序。曾經有流言說資金從香港流走,但事實是香港銀行體系不單沒有明顯的資金流出現象,相反至 2020 年底合共有500億美元資金流入港元體系。」。

喺示範答案入邊,考生引述資料提到嘅疑慮指,「有傳言香港資金外流,但事實是香港銀行體系不單設有明顯的資金流出現象,相反在2020年底合共有500億美元資金流入港元體系。可見,該疑慮不攻自破。」

有中文老師閱讀試卷後指出,成語「不攻自破」解釋為「不用攻擊就自動破滅」,與題目「如何釋除疑慮」不符,如此作答以中文科議論文嘅標準去睇,語病甚深,會有離題之虞;加上考生答案只係抄錄資料內容,未有加以分析,對於咁嘅答案可以成為學生示例感到奇怪。

#公社科 #公民及社會發展科 #公社科 #考評局 #學生示例 #不攻自破 #國安法 #釋除疑慮 #香港教育 #港語學

0 0 votes
Article Rating