我以前做補習，主要係教高中中文，幫學生預備公開試。一來寫過教參書，對課程瞭然於胸；二來高中生較乖，冇秩序問題易教。本港大部分學校去到高中，都會恢復返粵語教學，以提升學生成績。所以我做咗幾年補習，都冇見識到「普教中」（普通話教中文）學生嘅問題。

俊仔係讀天主教名小學嘅乖仔，見到人識打招呼、講唔該。雖然只係小三，已經睇緊Harry Potter英文版，Roald Dahl全集已經睇完。但係媽媽話：「佢唔鍾意中文㗎，你幫下佢啦。」我接過佢本手冊一望，七份家課，大部分包括英文、數學都加上剔號；只剩中文兩項遲遲未做：工作紙、背默課文。畏懼中文之心，可想而知。

首先幫佢解決工作紙。一路上望住佢勢如破竹，飛快咁填寫選擇題同填充題。「救命呀！」佢叫喚我。我望一望空白位，話：「『悉心』通常都係配『栽培』，『悉心栽培』，你冇聽過人講咩？」佢「啊」一聲，恍然大悟，好快就填寫好答案。

之後都順利作答，直到最後一題長題目卡住：「聽了醫生的教訓，小明下了一個怎樣的決定？」小學生答題訓練，往往都比較機械式。例如第一題「小明的運動計劃是甚麼？」俊仔首先就刪去「甚麼」，抄下「小明的運動計劃是」一段，然後再從課文中搵出字詞，續寫答案。所以到呢題，佢寫「聽了醫生的教訓，小明下了一個」就停低，因為暗覺語理不通。

我話：「工作紙嘅中文，未必係最好嘅中文。好似呢度『下了怎樣的決定』，我哋廣東話會講『小明決定咗啲咩？』。『決定』本身就係個動詞，加咗『下了』就累贅得多。」俊仔立即意會，改寫得更通順。

之後就揭開課本，幫佢溫習背默，課文係臺灣詩人楊喚嘅《家》。課文之間密密麻麻堆滿羅馬字母，似本普通話書多過中文。我之前無問，呢刻先知佢學校搞「普教中」，因此特意用母語係國語嘅作者，只為增強兒童「語感」。

我叫佢背嚟聽下，佢搖晒頭，話唔識。足足八十幾隻字，要一晚背起，從何入手？我忍唔住問：「老師教書係用普通話？咁你未試過用廣東話去學、去記？你其實可以用廣東話去記嘅。」

仿似天方夜譚，又真係打破佢想像。佢成個人醒晒，碌大對眼，似懂非懂咁點頭。於是我輕咳一聲，清清喉嚨，輕聲朗讀一次比佢聽：

「樹葉是小毛蟲的搖籃，

花朵是蝴蝶的眠床，

歌唱的鳥兒都有一個舒適的巢。

辛勤的螞蟻和蜜蜂都住著漂亮的大宿舍。

螃蟹和小魚的家在藍色的小河裡，

綠色無際的原野是蚱蜢和蜻蜓的家園。」

佢聽得入神，好似去咗龍宮睇魚蝦蟹做大戲咁。佢從未諗過，讀書嘅語言可以同日常生活咁貼近。我又話：「記呢首詩，其實唔難，因為你只要記住每種動物喺唔同地方就得。好似頭兩句『搖籃』、『眠床』，其實都係同一種意象，講小動物喺屋企瞓覺⋯⋯」

聽到「瞓覺」一詞，佢「格格」咁笑出聲，反而我就有啲震驚！

我冇諗過「瞓覺」一個地道啲嘅詞語，可以帶畀小朋友歡笑。更加無諗過呢次解釋課文，好似先令小朋友第一次讀得明篇文！我轉念一諗，悲從中來。難怪俊仔三年小學，越來越厭倦中文。當中文科嘅語言咁陌生，脫離生活，上堂仲有咩趣味可言？仲可以點樣畀佢睇到讀書、學習嘅意義？

以前搜集有關「普教中」嘅研究論文，「學習成績下跌、課堂互動減少」，呢啲白紙黑字、鐵證如山嘅壞處我都讀過，但一切比唔上「普教中」學生擺喺我面前。俊仔係香港出世，天資聰穎，但都俾「普教中」搞到對中文科無晒興趣，情願睇成屋英文書，都唔掂下中文。咁其他學習無咁叻嘅小朋友點算？我哋下一代嘅中文又點算？

衷心希望家長可以抽少少時間，睇下仔女嘅功課，了解佢哋學緊嘅係乜嘢——要救下啲小朋友！

作者：陳樂行

#普教中 #粵教中 #中文教育 #中文科 #小學中文 #中文補習 #廣東話 #普通話 #陳樂行 #港語學