小學4月19號起復課 不打針學生可如常上課 但禁止非學術活動如體育、音樂

現任行政長官林鄭月娥今朝(11日)喺記者會交代下星期復課安排,佢話學校都可以喺復活節(即19號)後分階段復課,但會有兩項措施,即係師生每日要做肺炎嘅快速測試,驗到陰性嘅先可以返學;而冇打針嘅學生非學術活動會有限制。

林鄭指確診個案跌緊,而學校做到以下四樣嘢,所以可以復課:一、師生戴好口罩、量體溫、保持適當社交距離等;教職員喺學校要用「疫苗通行證」,唔打針唔可以教書;三、學校改善通風、做好消毒工作;四、學生有打針,12至19歲學生嘅第一針接種率已達97%。

當局亦都會加上兩個措施:一、教職員及學生要每日做快測,陰性返校,陽性則須呈報當局,政府將為學校提供1000萬快測包,足夠學校未來一個月使用;二、考慮部分學生冇打針,佢哋非學術活動將會受限,保護呢一群未打針嘅同學。

中學方面,教育局局長楊潤雄就話,喺DSE後5月3日開始自行決定如何分階段復課,最遲5月10日恢復全部級別半日面授;小學最早4月19日分階段恢復半日面授課,暫未能恢復面授嘅級別可繼續上網課,最遲5月3日須恢復面授課。

#林鄭月娥 #楊潤雄 #港語學 #復活節 #復課 #快速測試 #DSE #疫苗通行證