今日（20號）教育局局長楊潤雄喺社交平台再次呼籲，企業及市民喺文憑試考試首兩星期（即4月22日至5月8日），盡可能採用彈性時間上班，避開早上6:30至8:30嘅繁忙時間，俾考生前往考場時，交通更為暢順。教育局今年亦都特別要求公共運輸機構加強返服務，同埋喺唔同地方落廣告同DSE考生打氣。
由楊潤雄放喺社交平台嘅圖片可見，今屆教育局特登喺港鐵車站同巴士落咗廣告，強調「有志者事竟成」。佢又話，教育局會「陪伴你左右」，喺公共交通工具、社交媒體及教育局網頁等不同平台為考生一路打氣，相信都落咗唔少本錢。
楊潤雄最尾都祝福下各位考生。不過可能祝人人「科科摘星」、「高中狀元」其實係冇可能、唔現實，佢只係好保守咁講：「祝各位考生能順利完成本屆文憑試」
#楊潤雄 #教育局 #DSE #文憑試 #有志者事竟城 #遲啲返工 #返工遲到 #彈性時間上班 #公開考試 #港語學
