文憑試今日開考，有本地電視台就做咗專題報道，引述跨境考生同中學校長公開投訴指，面對疫情獨自來港準備考試難上加難，期望考評局考慮喺深圳設立試場，「令呢批跨境考生可以有家人陪同下，面對人生中嘅一大考試」。考評局就回應電視台查詢話，而家仲研究緊有關安排，因為喺內地舉辦文憑試有好多考試相關規則、運作同試場安排等嘅複雜問題。

電視台訪問咗跨境考生佔全級十分一嘅北角培僑中學，應屆考生張芷凝用普通話講話：「2019年有暴動，之後又有疫情，在學校都沒有上過幾天實體課。」今年提早由珠海來港幾乎「無家可歸」，後來培僑安排宿舍畀佢瞓，情況先有所好轉。

另一個考生何凱文就話，一個人嚟香港考試，過時過節只有課本作伴，感到「荊棘滿途」。「做題時有好多錯誤，我係咪真的不是讀書的材料？幾乎有少少想放棄」。

培僑中學校長伍煥杰就話：「我期望考評局可以積極考慮喺深圳一河之隔設一個試場，令呢批跨境考生可以有家人陪同下，面對人生中嘅一大考試。」

事實上，呢批考生並冇香港身分證。根據考評局資料，今屆有328個人唔係揸香港身分證嚟報考，但已經冇2019年嘅402人咁多。考評局又喺回覆電視台查詢時透露，喺內地舉辦文憑試涉及考試相關規則、運作及試場安排等多項複雜因素，仍然係研究緊有關安排。