辭職後參選特首 職業唔寫無業填乜嘢好? 曾蔭權、曾俊華、林鄭、李家超分別交出四個答案

1997年,第一任特首董建華參選時表格填咩已經無從稽考,不過佢一向都自稱「商人」出身。但自從2005年時任政務司司長曾蔭權參選特首,因為公務員參選特首都要先辭職,理應係「無業」,如何「無業」得嚟又唔肉酸,又係一個學問。曾蔭權就開啟咗香港辭官選特首嘅慣例,每任寫法都各有新意,盡不相同。

2005年,曾蔭權喺職業一欄寫上「政治家」。雖然政治家都可以叫做自僱人士得嚟合理嘅寫法,但就俾時人批評佢大言不慚,根本係執二灘,但居然可以自詡自成一家。結果2017年特首選舉,擅長公關嘅曾俊華就引以為鑒,謙稱自己係「公僕」,一時佳話;反觀林鄭月娥就留白,雖然相形見絀,但起碼都誠誠實實。

昨日(23號)專頁「每日關注李家超中文水平」就留意到李家超喺職業填前政務司司長,批評「職業同稱銜都唔識分」:「乜職業可以『前』架咩😅😅仲有,政務司司長唔係一個『職業』嚟架喎……你可以寫『公共行政』『公職人員』,但『前政務司司長』係乜鬼啊?😅😅不過你又尷尬啲嘅,嚴格嚟講你宜家係『無業』」