海關搶先改用中式步操 感謝解放軍訓練 配樂改為《歌頌祖國》口令改用普通話

香港海關宣布由今日(五月四日)起,全面採用中式步操,即係話自此以後慶典儀式、結業會操同其他制服都會中式步操禮儀。之前海關係用英式步操嘅,兩年前仲同其他紀律部隊回覆傳媒話「暫時沒有計劃修改現時的步操方式。」不過,香港警察早喺年頭宣布喺今年7月1號起採用中式步操,但就估唔到最終俾海關趁「五四青年節」突然搶先。

海關發言人話,衷心感謝中國人民解放軍駐香港部隊為海關人員提供中式步操訓練,亦都喺多個典禮上中式步操演示畀咗寶貴意見。海關又話,專登揀「五四青年節」去改用中式部操,因為「五四運動孕育了以愛國、進步、民主、科學為主要內容的偉大五四精神,其核心是愛國主義」,揀呢日「正正體現海關全體人員不斷追求進步的堅定決心,以及對國家的歸屬感及愛國情操。」

海關認為改用中式除咗可以提高步操表演嘅可觀性外,「亦讓部門更好融入國家體系,豐富『一國兩制』內容」,充分體現國家情感,彰顯民族情懷,「並展現香港特別行政區紀律部隊的風範」。

其實海關的確係比其他紀律部隊早練中式步操。根據《東方日報》2013年嘅報道,「貪湯(按:前海關關表湯顯明)執掌香港海關四年間,已被指花盡心思,去逢迎及籠絡內地官員及內地駐港官員……某次學員結業會操中一反傳統,放棄向來採用的英式步操,特別改操「鵝步」,即解放軍常用的步操,以迎合觀禮的內地駐港官員口味。」

中式步操同英式步操好容易外型上就可以分辨:最主要特徵係中式步操前手會橫擺胸前,唔似英式擺向前方;踢腳亦都會比較高,因此有「鵝步」之稱,所以有人話英式感覺比較輕盈,而中式比較威武。另外,以前大家都用英文,香港警察嘅中式步操就採用廣東話口令,象徵「一國兩制」;不過喺舊年十月嘅海關結業會操,就係用普通話指令,而配樂就用埋愛國歌曲「歌頌祖國」,感覺更加根正苗紅。

#中式步操 #英式步操 #海關 #紀律部隊 #五四精神 #五四運動 #五四青年節 #英文 #普通話 #廣東話 #歌頌祖國 #港語學