李家超政綱隻字不提少數族裔令團體擔憂 翻查連林鄭政綱都有提歧視及教育問題

唯一特首候選人李家超喺上個月尾出咗政綱,亦都喺會見咗團體其間見咗啲少數族裔朋友,不過政綱就見唔到有關議題嘅蹤影。關注本港少數族裔權益嘅香港融樂會今日(5號)就喺報章撰文,指出李家超喺「少數族裔及兒童政策議題「交白卷」,反問佢振振有詞宣稱嘅綱要「同建關愛共融社會」,係咪「不包含本地少數族裔的份」? 佢哋又翻查上任特首林鄭月娥嘅參選政綱,發現林鄭起碼喺歧視同教育議題上都有著墨。

融樂會指出,16年平機會發表嘅《歧視條例檢討》 27項優先修例事項,現時只有8項通過,其餘19項都俾政府「束之高閣」。尤其目前《種族歧視條例》豁免政府行使職能時嘅種族歧視,令到好多少數族裔朋友俾政府無理截查甚至言語攻擊,都只能忍氣吞聲,無從申訴。此外,相比政府主動咁收集內地新移民資料去提供支援,政府只係被動咁俾有心人攞有關支援其他族群嘅資訊單張。而且,香港一直都未有合適配套畀少數族群去學中文,令到佢哋好難融入社會、尋找工作。

融樂會又提到,雖然李家超一再強調多元、共融,但佢哋翻閱過往2017年林鄭月娥喺特首選舉政綱嘅單張,都識得喺中文教育、歧視條例檢討上對少數族裔議題有所著墨。「回看現時候選人李家超的政綱,竟然對少數族裔議題半點不提,毫無方向,令人失望。」佢哋寄望李家超喺上任後可以正視下少數族裔聲音,交出功課。

#香港融樂會 #少數族裔 #李家超 #廣東話 #中文教育 #種族歧視 #香港種族歧視 #種族歧視條例 #李家超 #林鄭月娥 #融樂會 #港語學

5 1 vote
Article Rating