教育局目前畀學校指引係未打針學童雖然可以返學，但就話未打齊針嘅學生唔可以參加「非學術活動」；至於乜嘢係「非學術活動」，就間間學校都唔同。臨近學期尾聲，有好多學校通告家長話，要求學生打夠兩針先可以參加畢業禮。香港兒童權利委員會尋日嘅聲明就透露，「部分學校甚至有超過三分之一學生未能達到已接種兩劑疫苗的要求而不能參與畢業典禮」，情況極不理想，擔心為學童校園生活最終章蒙上陰影。

委員會話，收到唔少公眾查詢有關學校為出席畢業典禮嘅學童設定疫苗接種要求。由於兒童嘅疫苗接種要求近日才作出修改，部分學校甚至有超過三分之一學生未能達到已接種兩劑疫苗嘅要求而不能參與畢業典禮。睇返而家社交距離限制放寬如八人一枱食飯，畢業典禮同理都可以妥善舉行。委員會建議安排座位，戴口罩唔飲食，加上學生現時每日做緊快速測試，相信已有足夠保障。

委員會促請教育局盡快釐清有關學校舉辦畢業典禮嘅健康指引，以安撫近日獲學校通告得知有關安排嘅學童同家長嘅焦慮。兒童喺疫情下身心深受影響，特別係他們長時間不能回校上課同使用公園及休憩設施。學校和教育局嘅理解同支持，對學童渡過難關十分重要，希望可以俾所有學童都能參與屬於佢哋嘅畢業典禮。

#畢業典禮 #兒童疫苗 #打針 #抗疫 #教育局 #幼稚園 #幼兒園 #小學 #中學 #香港兒童權利委員會 #兒童權利委員會 #港語學