教育局解除未滿針學童畢業禮禁令 每日返學前快測維持至下月下旬

教育局修訂學校防疫嘅措施,放寬學生參與半日而無須除下口罩嘅活動條件,幼稚園及中小學嘅所有學生都可以出席畢業禮,但學校要盡量縮短典禮時間,減少安排表演活動,出席者應盡量平排而坐,避免面對面活動。如果中小學生要參與除下口罩嘅表演活動,相關學生須打齊2針滿14日。

事緣最近有好多學校通告家長話,要求學生打夠兩針先可以參加畢業禮,但有團體就透露其實有啲學校過三分一學生都未打夠兩針,家長學生都對能否參加畢業禮極為擔心。

局方又喺新指引話,中小學及幼稚園喺禮拜六亦可安排學生做半天唔使除口罩嘅非學術性課外活動,例如校隊訓練、音樂或體育活動。至於每日做快速抗原測試嘅安排,教育局認為有需要維持至下月下旬。

#畢業典禮 #兒童疫苗 #打針 #抗疫 #教育局 #幼稚園 #幼兒園 #小學 #中學 #香港兒童權利委員會 #兒童權利委員會 #港語學

0 0 votes
Article Rating