尋日（21號）中國廣東網絡廣播電視台推出「全球首個粵語虛擬偶像」，個名叫做「悅小滿」，原來喺本地電視香港電台都有直播。佢話因為揀喺農曆四月廿一出道，所以就用當日嘅節氣「小滿」為名。小滿以粵語對話為最大特色，「形象設計融合多種嶺南文化元素」，希望針對大灣區年輕受眾，參與元宇宙嘅開拓。

發言人話，悅小滿將會突破次元壁界限，將非遺（非物質文化遺產）、藝術、時尚、嶺南文化等傳統同潮流完美結合，「可以係嶺南非遺剪紙嘅主角、醒獅技藝嘅傳承人」。佢會通過同各式各樣嘅藝術家、設計師以及時尚達人合作，變身出無數嘅形象，突破真人主播受場景、空間、時空嘅界限，為用戶帶來沉浸式影視體驗。

不過，就記者喺直播所見，小滿用投影方式出現喺舞台，都經常會見到起格、黑邊、閃爍等嘅問題，似乎有關技術都未達到10年前日本虛擬偶像初音未來嘅水平，而且經常有唔對嘴嘅情況，進步空間依然有好多。另外，標榜廣東話嘅小滿出道之作《元氣小滿》竟然係用普通話演唱，聲音都只係比較似真人代唱加電音effect，令人扼腕。

而且，早喺10年前，香港已經有虛擬廣東話代言人會計妹出現，後來亦都有大陸投資、唱廣東歌嘅虛擬偶像「紫嫣」。

#虛擬偶像 #悅小滿 #初音未來 #廣東話 #廣東歌 #粵語 #元宇宙 #港語學