Apple噚日（6號）舉行發布會，推出M2晶片同埋新MacBook，不過好多香港用家關注嘅，應該都會係官方正式新增嘅廣東話輸入法。事關之前Apple雖則話好重視香港地區，但上年新增嘅功能都係廣東話辭典同埋語音控制（Voice Control），用家最常用嘅粵語拼音輸入法，反而遲遲未見蹤影。可能都睇到香港網絡嘅呼聲，Apple今次都正式推出粵語拼音輸入法，唔少香港網民都話終於收貨。
蘋果官方cap圖
拆App達人 Jane Wong就喺Twitter分享佢嘅試用圖片。如圖所見，當佢用廣東話鍵盤輸入「jung yu yau gwong dung wa syu yap faat jan hai hou jeng a」嘅時候，無需標上音調，iPad都即刻出到「終於有廣東話輸入法真係好正啊！」嘅字句。似乎唔需要完全寫晒音標，或者跟足某一種拼音規則，都可以流暢咁輸出廣東話句子。
粵拼係香港語言學學會粵語拼音方案嘅簡稱，因為佢採用羅馬化拼音，都好便於電腦輸入。今次Apple就表明係可以根據粵語拼音方案同其他拼法去寫，實際操作都證明，其實唔雖然跟足特定嘅粵拼規則，只要按住類近嘅拼音打出嚟，都可以輸出到廣東話字。
#ios #廣東話輸入法 #蘋果電話 #蘋果手機 #廣東話字典 #廣東話辭典 #廣東話詞典 #語音控制 #語音識別 #粵語拼音 #普通話拼音 #廣東話鍵盤 #廣東話 #港語學