曾言「廣東話非法定語言」 蔡若蓮將接任教育局局長 楊潤雄調任文旅局長

《星島日報》報道,教育局局長楊潤雄將調任為新設嘅文化體育及旅遊局局長;教育局局長一職,「極有可能」由副局長蔡若蓮升任。消息指,楊潤雄日前喺高層會議上,叫常任秘書長李美嫦同副秘書長向蔡若蓮匯報日常工作,暗示提前交接。蔡若蓮本來喺上屆都係大熱嘅局長一選,但因為民間一片反對呼聲,先「屈就」做住副局長。佢之所以咁多人反對,亦都同佢以前力主用「普通話教中文」、「廣東話並非法定語言」等言論不無關係。

蔡若蓮曾擔任教育局任職高級課程發展主任,當時已喺公開講座去全港學校倡議「創造語境,全校參與——建立校園推普機制;全體教師掌握普通話!」不過鮮有學校跟從。後來港語學2014年揭發佢喺教育局網頁撰文寫下「廣東話(一種不是法定語言的中國方言)」一句,更加惹起公憤,最終教育局需要即時道歉同刪除有關網頁,事件先至平息。

蔡若蓮其後轉任左派學校福建中學(小西灣)校長多年,仍然念念不忘從政。2016曾參選立法會,但不敵民主派嘅葉建源;翌年參選選舉委員會亦都輸畀另一位建制派。但佢喺2017年,超過1萬人聯署反對之下仍然順利上任教育局副局長一職,當時承諾上任後會聆聽各方聲音,但隨即被發現喺FB封鎖反對佢出任嘅港語學召集人陳樂行。同年,罹患抑鬱症嘅25歲長子潘匡仁自殺墮樓身亡,喺教大張貼大字報譏諷蔡若蓮嘅大學生被嚴懲。

#蔡若蓮 #潘匡仁 #陳樂行 #教育局 #港語學 #廣東話 #法定語言 #普教中 #普通話教中文 #教育局局長