自上年9月起，中四學生上全新取代通識科嘅公民及社會發展科（公社科）已經一年，但教育局時至今個月初（6號）先至公布教科書。另一邊廂，近日教育局舉行咗4場公社科「分享會」，就狠批老師「態度輕佻」、「照讀Powerpoint」。教育局提醒學校要小心選任公社科老師，「回歸課程初心，防止變形走樣」。

《明報》報道，教育局睇堂後喺「分享會」指出多個公社科教學嘅不恰當事例，例如有老師向學生話「講到呢度我都係唔好講喇，播片好啲，費事講錯嘢」，「呢種幽默感好唔恰當」；又有老師教國家安全觀嗰時話「我都唔明點解納入呢個範疇」；喺展板上面寫「因為有《國旗法》、《國歌法》，所以我們必須尊重國旗、國歌」，無帶出國旗、國歌背後嘅意義；有問學生「邊啲嘢適用喺香港，邊啲嘢適用喺內地」，好似分化緊香港同內地咁。

有唔想開名嘅中學校長就話，官員提醒公民科課堂唔好「淨係讀PowerPoint」，但佢聽到都覺得好難做，因為今年都未出教科書，「（局方）嚟睇堂更加唔敢亂演繹，原來咁樣都唔得！」又話冇諗到教育局會有咁多「硬指示」，會敦促學校由上而下監察公民科教學，「唔想同事有情况（後果），都會擺低諗法情緒跟住做」。

#公民及社會發展科 #公民科 #公社科 #教育局 #睇堂 #觀課 #通識科 #讀powerpoint #國旗法 #國歌法 #國安法 #廣東話 #港語學