教育局近日就話，會喺新學年繼續推行「中國抗日戰爭歷史教育」嘅教師專題講座暨實地考察系列活動、教學支援計劃同學與教資源，包括喺下月展開嘅香港抗戰歷史系列（三）同（四），以及喺9至11月推出「九一八事變」戲劇教育活動。

據悉，教育局喺本月6號向全港中小學通告話，將繼續舉行「中國抗日戰爭歷史教育」系列活動。下個月開始就會幫啲老師搞「中國抗日戰爭歷史教育 」專題講座，同埋一系列實地考察，分別係：「1941年香港戰役空間史研究」網上互動地圖嘅分享會，以及香港抗戰歷史系列：「香港的淪陷與抗日活動」。

中國抗日戰爭史相關教育教學支援計劃方面，當局將會推出戲劇教育嘅形式研習「九一八事變」的教學試驗計劃，以支援教師教學並提高學生研習歷史嘅興趣。

之前有小一學生睇咗抗日戰爭嘅相關影片，情緒不安需要學校提供輔導。教育局就提醒，由於部分內容涉及戰爭的殘酷場景，教師在使用上述教材時，須因應學生年齡、學習進度及其他校本情況，適當地剪裁或選用。

教育局喺附件教材嘅結語話，「抗日戰爭」係每個中國人都不能忘記嘅歷史，希望學生能謹記戰爭係殘酷同可怕，要學會珍惜得來不易嘅和平；並且喺人民艱苦抗戰嘅事跡出發，學習承擔精神、堅毅、責任感等價值觀，「感受家國情懷，以裝備自己，貢獻國家」。

#教育局 #愛國教育 #抗日戰爭 #歷史教育 #中史科 #抗日戰爭 #九一八事變 #戲劇教育 #抗日戲劇 #抗日神劇 #廣東話 港語學