中環在線:陶傑揶揄簡體字 汇丰似魚蛋銀行 – 李華華

蘋果日報 2016/02/15 00:00


教育局就「更新中國語文教育學習領域課程(小一至中六)」嘅諮詢今日完結,當中建議學生學習簡體字一事,引起社會熱列討論,好多人反對。才子陶傑喺facebook(fb)就借滙豐控股(005)講簡體字嘅弊處,指滙豐簡體係汇丰,似「存錢入一間空倉的魚蛋銀行」,認真大吉利事!
陶傑喺fb話,以繁體字寫滙豐,「雖然筆劃多一點,但繁富滿目,象形結構端厚方正,基礎穩固如磐石,存錢進去,令人放心」。
一變成簡體字「汇丰」,「汇字的內容被搬倉一空」;丰字「形似一根竹籤、三粒魚蛋;又或好像一支叉,叉着三條燒烤的腸仔」。咁仲唔係一間空嘅魚蛋銀行?
咁都唔止,才子繼續發揮創意,指BBQ係用火嘅,而水為財,水火相剋。大家去銀行打簿仔,當然希望家肥屋潤,點會想到錢會逐少逐少被烤乾蒸發,又或者窮得要喺街邊魚蛋當一餐?真係越講越有道理。
咁啱滙控近年壞消息纏身,成日cut cost都好似唔多掂,股價係咁跌,家50蚊都冇,唔通真係好嘅唔靈醜嘅靈?