香港理工大學喺4月終止承認並開始逼遷學生會，對於即將入讀Poly嘅新生嚟講，最關注嘅梗係ocamp有冇受影響。Poly學生事務處前兩日（29號）就宣布就喺簡介會向學會宣布，所有迎新活動，不論校內或校外，均禁止過夜。
前身為理大學生會編委會嘅 @redbrick_presscom 紅磚社學生報報道咗學生事務處喺取締學生會後嘅跟進方案，原本附屬學生會嘅系會同學院會由下學年開始，學生都會自動變成會員，無須繳交會費。
各學會嘅主辦單位（hosting unit）變成學生事務處、學系同學院，相關學會唔可以擁有獨立嘅銀行戶口，收支都要經主辦單位提供嘅項目戶口（project account)。各學會七月十五日遷出學生會大樓（VA）後，學生事務處只會提供校內儲物櫃。
迎新活動方面，學生事務處會喺八月二十五日至二十六日為新生舉行迎新資訊日（Orientation Info Day），只有獲邀組織先可以參加，而所有迎新活動均不能過夜，無論校內或校外。
熟悉大學文化嘅「浸大山神」認為，無咗ocamp，無疑係對大學文化嘅一大損害。因為疫情，有啲大學已經兩年冇得搞實體嘅ocamp，而家仲要唔俾過夜，「咁嘅ocamp根本係名存實亡！」佢認為大學高層或者以有色眼鏡看待迎新活動，但過夜活動對於年青人建立團體精神同對學系嘅歸屬感好重要。
迎新營有好多為人熟悉嘅活動都要過夜先玩到，例如營火會、「First Impression」、「一生人一次」等