考評局預報中英文科合格率最多只跌1% 中文名師估計失手與《校服的自述》有關

2022年DSE中學文憑試聽日(20號)放榜,考試及評核局今日(19號)啱啱舉行記者會,公布整體考生表現。對於外界最關心嘅中英文合格率(以3等計),考評局話兩科都多咗少少人唔合格,不過跌幅唔夠1%。

總監麥勁生公布話,中文科有當中59.7%日校考生獲level 3或以上成績(上年60%),9.6% 取得第5級或以上成績(上年10.6%);英文科就有53.2%日校考生(上年54.2%)考到level 3或以上成績%,跌咗1%。至於數學同通識,分別有82.8%同89.8%嘅人考到Level 2,成績同舊年相若。

被問到中英文科成績下跌,係咪同呢兩科取消咗考試有關,麥勁生認為,每年考生表現必然唔一樣,輕微跌幅係正常現象。

八本文化教育嘅Ken Sir就分析指,中文科嘅成績下跌應該同今年比較跳脫嘅寫作題有關:「閱讀卷公認出得易過上年,但考生炒中文嘅人都多咗,好明顯關寫作卷事啦,好多人寫《校服的自述》呢題太自信喇。」

不過Ken Sir都提到,各間院校今年都放寬咗收生門檻,唔要求科科合格,希望大家都放鬆心情,「既來之、則安之」,好好計劃升學嘅方向。

《校服的自述》係今年DSE題目,要求考生想像自己係一件要離別主人嘅校服,並抒發不一樣的體會。雖然題目比較與別不同,有日校老師估計,都有超過四成考生揀咗呢題作答。

#校服的自述 #dse放榜 #dse中文 #dse英文 #dse3322 #考評局 #麥勁生 #香港考生 #中學文憑試