浸大上年起喺課程加入「國安教育」，成為「普通話考試畢業門檻」後，另一「特色」畢業要求。傳聞有一年級同學在國安教育測驗無法通過，擔心影響畢業。浸大喺近日回應傳媒時確認事件屬實。浸大話，大部分同學都通過咗測驗，至於少部分唔及格嘅同學，佢哋會提供「學習支援」，應該都可以重考。

根據浸大校方指引，21/222 學年開始，所有本科課程新生（包括一年級生，及二、三年級插班生）都必須完成 NSLE0001 國安課程，作為畢業要求。課程要學生參加 2 小時嘅現場講座、完成兩小時閱讀材料、並喺測驗中獲得「及格」，先至叫做完成全套 NSLE0001。

測驗要成及格分數為 75%，比起一般課程要求高。學生可以考多幾次，但只會計最高分嗰次。如果學生喺 31 日內未通過測驗，佢哋會被要求再次參加國安教育講座，或者要額外咁參加「輔導課」，之後再參與個測驗。

外媒報道，浸大國安教育課會請大律師教學，當中警告學生話，國安法具有震懾力，違者將受到嚴懲。學生之後要完成20條英文選擇題，分辨「頑皮小姐」（”Ms Naughty”）及「違反先生」（”Mr Breach”）違反國安法下邊一條罪行。例如其中一題問，「頑皮小姐」喺Telegram群組要求其他成員堵塞鐵路，藉此阻止人們上班，從而逼使政府落實立法會普選，佢干犯咗咩罪行？供選擇嘅答案包括：A.煽動分裂 B. 顛覆 C.恐怖主義 D.勾結外國勢力。上堂時演講廳內至少有一部閉路電視，且有不知名攝影師拍照。

#浸大 #hkbu #hongkongbaptistuniversity #國安教育