蔡若蓮又釀語言災難! 教育局澄清普教中政策沒有改變 個別傳媒解讀為「全面推普教中」說法不精準

教育局局長蔡若蓮近日接受大陸傳媒《環球時報》訪問時,突然話「如未來條件可行,教育局將考慮在香港學校中推廣完全用普通話教授中國語文等課程」,令到家長及教育界恐慌。其後教育局發言人回覆傳媒指,係「個別傳媒」解讀得唔精準,澄清話普教中政策冇改變。

教育局回覆傳媒話,呢句本義同「如條件可行,學校可以用普通話教授中國語文科」相同,有個別傳媒其後解讀為「考慮在全港學校推行普教中」或「全面推行普教中」的說法不精準。翻查資料,連親政府傳媒《文匯報》都以「蔡若蓮考慮校內推廣完全用普通話教授中國語文等課程」為題報道,反映蔡若蓮發言,令不論政治立場嘅人都被誤導。

教育局重申「普教中」政策一直以來冇改變,指喺2002寫過「用普通話教中文」是遠程目標。至於學校推唔推「普教中」,要由學校按本身情況專業咁作出決定,包括師資嘅準備程度、學生嘅普通話水平、校園語境、課程編排、學與教嘅支援等。

事實上,今次都唔係第一次因為蔡若蓮嘅用詞引起社會恐慌。早喺2014年,由之前身為語文學習支援主任蔡若蓮撰寫嘅教育局網頁文章,就將廣東話描述成「一種不是法定語言的中國方言」,最終喺港語學發起一人一信,各界聲討下,教育局為用語「含糊不精準」致歉。

#蔡若蓮 #教育局 #教育局局長 #普通話 #廣東話 #普教中 #港語學