油塘嘅直資小學福建中學附屬學校，新學年推出全新「孝道」主題活動，校方趁今日開學禮，邀請咗約60位學生家長同記者到返學，除咗跪地奉茶之外，仲有「揼骨」按摩、幫爸媽剪指甲等「孝道任務」。校長話，福建附小會舉行8項孝道主題活動，包括播《孝經》影片，舉辦「廿四孝」故事劇場，「孝道」問答同背誦比賽。校方更計劃學期中舉辦懷孕體驗周，全校學生要一連三日將「大肚」綁喺身上，體驗媽媽懷胎十月嘅辛酸。

校長徐區懿華話，中華傳統文化中，孝為百德之首，「但係而家啲父母普遍都非常錫仔女，可能好少教佢哋『孝順』嘅傳統觀念，而且父母向仔女講要孝順自己可能會好尷尬。」校方因此希望以活動讓學生熟讀《孝經》，探索孝道喺品德價值中嘅重要性。

福建中學同附屬學校通常都會被歸類為「左派學校」，呢啲學校都好強調國民教育，要求學生熟讀中國文化。福建中學附屬學校屬於直資學校，學生每年須畀$32500學費。

#福建中學附屬學校 #油塘 #福建中學 ##福建附小 #孝道 #中國文化 #跪地奉茶 #懷孕體驗週 #港語學