直資名校聖保羅男女中學附屬小學日前（2號）喺網上舉行小一入學申請簡介會。校方公布話，23/24年小一學額維持150個，今日（5號）起接受網上報名。所有報名學生均會獲安排面試，首輪面試全部報名學生都要面對面用廣東話進行。

簡介會高峰期有超過2,200人參與。校長張慧純話，佢哋希望藉住面試睇下學生嘅溝通能力、專注能力、待人接物嘅態度等，會重視學生「具好奇心、愛思考、主動學習；有童真、樂於聆聽、善於表達」等特質。

校長話，面試將用全廣東話進行，學生都可以母語表達嘅，不過入學嗰時，「因為我哋係中文小學，學生必須識得閱讀中文，以及講廣東話。」

眾所周知，聖保羅男女中學係本港狀元輩出嘅頂尖名校，而只要入到小學，就有好大機會可以「一條龍」升上去。所以雖然學費高達每年$64,300，好多家長依然趨之若騖。而且有經濟需要嘅學生，可以申請100% 嘅學費減免。

#spcc #spccps #聖保羅男女中學附屬小學 #聖保羅男女中學 #張慧純 #廣東話 #傳統名校 #香港名校 #港語學