英國駐港總領事以廣東話感謝港人 「港人與『事頭婆』相知相惜」

自英女王伊利沙伯二世上周逝世,過萬市民到英國駐港總領事館悼念。喺英女王國葬前夕,英國駐香港總領事戴偉紳透過影片,喺社交平台用廣東話向港人道謝:「感謝你哋嘅支持,以及對女王嘅致意。Thank you。」

 

戴偉紳喺影片提到,女王陛下曾經喺1975及1985年到訪香港,展現佢對呢個城市嘅尊重及愛護。佢又講述同佢丈夫幾年前同女王會面,言談間感到佢流露出對香港嘅認識同獨特情感。佢特別提到香港人會用廣東話「事頭婆」稱呼英女王,女王同港人實在「相知相惜」。

 

佢話,至今有超過12,000人進入領事館簽署弔唁冊,以及無數嘅人喺領事館外獻花致意。「過去一周,各位耐心有序嘅靜候以及肅敬嘅致意……炎熱天氣同喺幾個鐘頭嘅輪候,都無阻市民親身喺弔唁冊留下悼詞,令領事館上下深受感動。」領事館話,會設法保存呢啲對女王嘅心意。

 

#英國駐香港總領事 #英女皇 #女王陛下 #英女王伊利沙伯二世 #事頭婆 #廣東話 #港語學

0 0 votes
Article Rating