喺考公開試之前，學校都會畀個預估嘅公開試成績畀學生參考。到底呢啲成績準唔準呢？考評局最近就公布咗2022年嘅文憑試研究，結果發現，喺31科入邊，只有8科準確度有5成或以上。
英文科嘅預估成績比較可靠，準確度達70.2%，而且99%嘅人學校預估嘅等級level同實際成績都係喺一個等級之內。
但中文、數學同通識準確度就得50至56%。不過九成人都係喺學校預估成績一個等級咁上下。其他科目就無50%準確度，但都係七成人同學校預估成績最多爭一個等級。換言之，學校嘅預估成績都有一定嘅參考價值嘅。
喺八本文化教育教中文嘅Ken Sir就話，文憑試本身壓力大，加上今年因為疫情，考試時間同安排充滿變數，令考生壓力倍增：「有時本身校內成績幾好，但係輸狀態啦。」
佢認為研究都有積極意義，希望考生唔好俾唔理想嘅預估成績打沉，記得作息定時，平時操練都計下時間，自然可以喺考試時保持比較良好嘅心態應考。