當你想放棄中文科嗰陣 諗下香港街頭嗰啲俄羅斯人啦

一月,新年伊始,放眼都係更新嘅萬象。但對學生嚟講,依然係考試嘅寒冬。試前試後,同學時常抱怨中文科好難,欲哭無淚。呢個時候,我往往會分享一個俄羅斯人學中文、真實嘅小故事:

 

你有冇見過喺香港街頭上流浪嘅白人?疫情前,周街都有。佢哋有啲彈結他、有啲唱下歌、有啲靜靜地訓喺到,而佈置都不約而同:放頂小帽或小盒子喺地下,等路人課金支持。如果你停步片刻,你會望到旁邊硬係有張紙牌,上面寫住流利嘅中文,講述佢哋嘅故事:為咗音樂夢環遊世界,但唔好彩俾人打荷包,仲唔見埋證件……

 

我一直很好奇,佢哋喺邊到學中文嘅呢?直至有一日,謎底先至解開。我偶然走上唐樓屋企嘅共用天台,竟然見返佢哋,仲紮埋帳篷,圍圈飲酒傾偈。當然,天台玩到污糟邋遢,我都好炆憎,但我都忍住道氣,同佢哋水吹,懶係好奇咁問:「你哋好犀利,點解會寫漢字嘅?」

 

「我哋睇都唔識㗎,但我哋會用Google Translate,將想寫嘅嘢譯做中文,然後一筆一劃將啲符號喺紙皮上描畫出嚟。」而且,佢哋夜晚喺我嘅天台上面交流寫文心得,切磋砥礪,力求文章寥寥數句就立意深刻,用字務求真摯,打動人心,使睇到嘅香港人都忍唔住課金。

 

講真,我好不滿佢哋整污糟我個天台,又作故仔呃人。後來,我同鄰居拉牛上樹咁,滴住汗來回攀走八層樓梯幾轉,先將佢哋嘅酒樽、垃圾清理乾淨——但對佢哋學中文科嘅決心,我真係佩服得五體投地。我同學生講:「人哋半隻中文字都唔識,又冇人教,又唔使考,都盡力用寫文。你呢?你點可以隨便就放棄,留空晒啲答案,三條橫線寫得一行?」

 

所以,當你覺得閱讀理解成篇都睇唔明,想放棄趴喺張檯瞓嗰時,諗下嗰啲俄羅斯人啦!你起碼都好似佢哋抄Google Translate咁,將睇落重要嘅句子抄一轉。每當你想放棄嗰陣,諗下嗰啲一筆一劃咁,描繪住漢字嘅俄羅斯人啦!

 

共勉之!

 

作者:Ken Sir(八本文化教育導師)

#kensir #kensir中文 #中學生 #dse中文 #廣東話 #港語學

 

(按:圖中寫字嘅話就話係烏克蘭人,但同我傾偈嗰個,甚至自稱係法國人。當然,我沒權查護照,無從稽考佢哋嘅國籍,不過為咗令學生容易理解,就當係俄羅斯人啦。)