普通話教中文(普教中)並非咩新鮮議題,但家陣真係遍及各大中、小學。我間中學初中都有搞普教中,係叻嗰兩班先會用普通話。我唔叻,無試過。我嗰時唔明,其實初中都必定要上普通話堂,中文堂又要用普通話?雖然無試過普教中,當時已經覺得好彩;如果用普通話學中文,上堂一定好唔慣。

睇番好多普教中嘅研究報告,普教中係能夠令寫文更貼近書面語,諸如減少「我走先」、「我食飯」等「口語入文」。誠如鄧城鋒於《關於「普教中」討論的反思》一文所說,『普教中』只能使學生遣詞造句更加規範,對於其他許多更重要的寫作因素,例如創意想像、命題立意、謀篇布局,卻不見得有甚麼幫助。」何國祥等(2002)的研究甚至指出,普教中班的成績和課堂表現均略遜於粵語教學班。主因是學生不識北方方言,聽唔明老師講課甚至唔敢提問。「學生保證了讀音或詞型句式不犯錯(或少犯錯),付出的代價是句子內容貧乏和思維訓練減少。『普教中』對中文科各大學習範疇教學的影響,尚待研究。」

 

時間表

 

普教中嘅影響係「尚待研究」,而普教中嘅推行就真係「急不及待」可以形容。語文教育及研究常務委員會零八年搞咗個四年計畫,拎兩億推動中小學改用普通話教授高小、初中中文科。呢個計畫都幾大規模,有成一百六十間中小學參加。計畫書裡面仲有個時間表,話二零一八年,「絕大部分學校推行普教中」,去到二零二八年就會全面用普通話取締粵語教學架啦。

我同班朋友就用中學概覽做個粗略統計,有啲有趣數字可以分享嘅。普教中喺沙田區最普及,接近三成九中學都搞。四成五嘅「普教中中學」都喺九龍。

董建華喺零一年施政報告都講:「市民亦必須學好普通話,才能有效地與內地溝通交往以至開展業務。」如果全香港中小學都用普通話教中文,一定對中港融合好有幫助。但既然普通話教中文對提升中文水平嘅成效存疑,我地更加要分析:咁對我地本土文化會有咩衝擊?對我地嘅中文水平會有咩影響?我哋成立咗港語學呢個專頁,希望大家都關注下。希望大家睇完篇文,識得關注國民教育,都識得關注下普教中;對於「普教中即將普及」嘅狀況有個意識,唔好做沉默的羔羊。

陳樂行

港語學召集人、中文教參書作者、補習老師、教育政策評論人

                           

作者介紹

Leave a Reply

avatar
  訂閱  
提示