隨住香港同大陸通關，好多旅客全面進場，但難免都有騙徒混入其中。有大陸嘅香港遊專家尋晚（24號）就唔分享香港嘅旅遊點滴，反而拍片警告同胞提防「普通話騙案」！佢話騙徒會先用廣東話搭訕，見你廣東話唔流利，就改用普通話同你傾偈，利用「老鄉」嘅同情心行騙。

香港遊專家「光无弟弟」喺小紅書上出咗條「香港騙術 引以為戒」嘅片。佢提到，騙徒會無啦啦問人「你係咪識講廣東話？」當見到片主廣東話唔流利，即刻用普通話講「喔那就好了！你講普通話！」投其所好令到片主放低戒備，之後訴說自己無錢搭車去機場，成功呃到「光无弟弟」身上嘅三舊水做車費。

片主話，當時心諗「大家在外都不容易，我這一聽我就心裡難過呀」，於是當對方要求佢畀三舊水，佢二話不說就拎咗出嚟。但佢後來越唔對路，覺得「借錢去機場」理由牽強，而且質疑身為大陸人留得低喺香港竟然可以「一分錢都沒有，能跑到這裡問人借錢？」佢隨即感嘆自己太傻，暴打自己頭部洩憤。

但大陸網民就對片主無乜同情，恥笑話呢招已經係萬年老招，「10幾年前羅湖火車站地鐵口，就有幾個女人用這招啦」 ，叫佢當買個教訓就算。亦都好多網民留言話佢哋自己或者親友都中招，質疑「中國人不騙中國人」呢句話仲有幾多成真。

#大陸 #香港 #香港通關 #騙案 #中国香港 #廣東話 #普通話 #香港騙案 #美麗新香港 #港語學