六十二年前在巴基斯坦嘅達卡大學,一群孟加拉大學生,用佢地生命同鮮血,守護佢地母語。哩一段事跡,亦令由二零零零年起,每年今日,成為一個非常重要嘅日子–—國際母語日(International Mother Language Day)。

翻查資料,原來當年巴基斯坦分開東、西巴基斯坦,東巴基斯坦人母語係孟加拉語,但國家嘅權力都集中於國家西部地區。喺統一同方便聯繫嘅堂皇名義之下,由西部主導嘅政府決定除去孟加拉語嘅法定地位,禁止政府及公共機構用孟加拉語。明目張膽嘅語言清洗引起公憤,一班大學生為咗守護孟加拉語嘅語言同文化,走上街頭,反對政府扼殺東巴基斯坦嘅語言。有道是蠻殺立威,政府決定向示威學生開槍,無辜鮮血為母語之尊嚴而流盡,青春生命為文化之延續而犠牲。暴力鎮壓令政府受全國遣責,之後孟加拉語一九五四年喺巴基斯坦得到正名,血,總算冇白流。

而今日香港,我地母語——廣東話——之地位亦都危危乎。比起當年巴基斯坦用強權去否定孟加拉語,今日廣東話嘅地位係俾人一步一步咁蠶食。如果有細心留意,除咗香港漸漸放棄本來能夠自立於國際嘅優勢,日益挨近中國,令香港對日常普通話應用嘅需求唔自然咁增加,香港嘅傳統媒體亦將既有嘅外語音譯去除廣東話,轉跟普通話,譬如迪拜(杜拜)、弗吉利亞(維珍妮亞)等。香港特區政府喺二零零八年開始,更用資助去利誘學校用普通話上中文堂(普教中),兩科合拼,唔理對學生中文水準有冇幫助,務求長遠可以改寫香港社會語言結構。與此同時,又喺不同媒介嘅中文教材入面明踩/暗踩廣東話,加埋之先教育局網站否定廣東話在香港法定地位,廣東話嘅情況,明顯到咗汲汲可危嘅境地。現時係有一股想剷除香 港文化地位嘅勢力,喺政治、經濟、教育、公共行政等多個層面,以暗渡陳倉嘅方法貶損廣東話嘅地位,消滅廣東話。

「要消滅一個民族,首先瓦解佢嘅文化;要瓦解佢嘅文化;首先消滅承載佢嘅語言;要消滅哩種語言,首先從佢哋嘅學校入面落手。」哩一句獨裁魔頭嘅名言,大家應該都耳熟能詳。現今「普教中」等一連串貶抑廣東話嘅手段,已經滲透香港社會各個角落。每一種語言,都有佢獨特嘅文化價值,唔應該俾強權同歪理沒殺,唔應該覺得自己嘅母語比唔起其他語言。襯住今日係國際母語日,香港人應該要清楚自己捍衛母語嘅權利,喺社會各範疇,盡一己之力,守護同欣賞我地寶貴嘅母語,莊敬自強,承傳香港文化嘅魅力。

SamXjones

正因冇人會知幾時會失去曾經擁有, 所以今日開始要收拾心情全力戰鬥。

                           

作者介紹

Leave a Reply

avatar
  訂閱  
提示