免試引入海外護士唔使識中文?盧寵茂:手術室護士毋須與病人溝通

政府月初提出建議修例話,要引入非本地培訓護士,或可免除執業試在港註冊。被問到語言不通會唔會影響服務水平等,醫衛局長盧寵茂話,部分護士毋須直接接觸病人,例如手術護士,所以唔太精通中文都冇問題。

盧寵茂又話,相關人士喺本來國家或城市都有一定臨牀經驗年期先會來港。佢又動之以情話,近日見到公院護士因工作量大而「做到披頭散髮」,情景令人傷感,「如果唔盡早解決人手問題,對前線同事不公平,又影響服務質素……必須有足夠『量』嘅醫護人員,才能夠繼續提升服務嘅『質』。」

外科醫生、立法會議員林哲玄就回應話,手術室護士要與病人溝通確認身分及手術部位等,所以都係識中文最好。有公立醫院註冊護士認為,如果係請護士做行政工作,無助紓緩前線壓力,咁就同修例原意背道而馳。

#香港護士 #hknurse #廣東話 #香港醫院 #hkmedical #你都係講返中文啦 #盧寵茂 #港語學