連續一星期睇到網上廣傳「中普融合」嘅資料,係鍾意香港嘅人都應該冇得唔驚。唔好以為「中普融合」同「普教中」係一樣嘢。「中普融合」更在於改造全校語言環境,甚至用大陸教師取代本地中文教師,進行潛移默化改造學童思想,將「講中文」理解為「講普通話」植入下一代人腦海之中,確立普通話為香港正式環境中使用嘅「中文」,完成推普廢粵嘅政治任務。話普教中係一個政治任務,絶非要無中生有將香港教育「政治化」,而係就算「普教中」真係一個有成效嘅教育改革,「教育改革要爭取支持和資源,所以改革在本質上是一種政治行為」(莫禮時等,1997)。更何況普教中由2003開始經過多年試行,發現降低學生整體語文能力,但教育局仍拒絶撤回,仲要開動輿論機器為普教中全力護航,話普教中冇政治動機絶對難以致信。

語言偽術 驚心動魄

令人「驚心動魄」嘅,唔單只係一個講普通話嘅「粵語魔俠」聲稱要用粵語「一統天下」,而係為人師表者用「有助學生我手寫我口」、「將語音和文字整合為一科」之類嘅語言偽術,向公眾隱瞞普教中實際影響學生學習中文,矇昧市民,俾普教中可以乘機繼續暗渡陳倉。

曾任語文教育支援組主任兼「内地与香港交流与协作计划负责人」,現任福建中學(小西灣)校長蔡若蓮聲稱「全世界只有香港把中文拆開做中文科和普通話科」,又話普教中「將語音和文字整合為一科」,實在係砌詞狡辯。香港作為中英並行嘅城市,廣東話一直以來係香港使用嘅中文。1952年中文課程委員會喺討論香港本地學校嘅中文課程目標時,提出嘅其中一個宗旨就係要「發展學生的母語表達能力」,「母語」即係「中文」,放喺香港嘅環境入,就包括廣東話同粵音。一直以來學生老師上中文堂時,朗讀書面語課文都係用粵音讀書,行之有效,並冇唔妥。學生識嘅每一個中文字都有一個對應嘅粵音,語音同文字從來都冇分開過。話普教中「將語音和文字整合為一科」,就即係拒絶承認廣東話係中文嘅客觀事實,非要將廣東話貶廢後再用普通話取而代之不可。

另外,培正中學校長葉賜添表示普教中「有助學生我手寫我口」之說,根本就係以偏蓋全。事實上普教中只係對學生掌握書寫語彙有微小幫助,但係明明中文能力就唔止係寫咁簡單,仲包括咗說話、聆聽同閱讀嘅能力。研究結果顯視普教中拖累學童整體中文能力,所以「中普融合政策誤人子弟」之說絶對唔係「攞嚟講」,係有根有據。一人一信要教育局撤回同普教中一切相關政策,絶對唔係「激進行為」。反而葉賜添只係提出普教中絶無僅有有嘅好處,對學童有其他付帶影響,身為校長居然隻字不提。到底佢為中普融合護航保駕,仲有幾多嘢係對公眾隱瞞,知情不報?

為推普而推普嘅教育改造

翻查年初港語學對學校調查所得到嘅資料,就已經發覺有學校為「提升普教中成效」而禁止校園使用廣東話。初時以為只係少數校長私下火上加油之舉,點知翻閱更多政府文件之後,發現要學校用普通話取代廣東話,唔係個別學校嘅決定,而係由教育局同語常會批出撥款,「語文教育支援組」支援學校推行嘅教育語言改造戰略。語言支援小組全力推動普教中,有成員現時仲做埋校長,基本上即係支援小組嘅自己人走入學校推行普教中。

普教中同國民教育一樣,都係用「撥款資助」同「人員支援」,將對學童發展有不良面影響嘅教育政策滲到學校入面。同推行國民教育時一樣,有一個「國民教育中心」擬訂好內容,資助撥款吸引學校校本「自主」「試行」,等「試行學校」出現「成效」,再由教育局中央下令「全面推行」。如今普教中到中普融合都不過係按藍圖執行,亦同國民教育一樣聲稱由校本自決。不過,雖然普教中成效之低甚至連曾經試行嘅學校都矢口聲言拒絶再辦,但係一班官員仍唔甘心任務就此失敗,連出招貶粵都用埋,為求日以繼夜用輿論撒播對推行普教中有利嘅迷思,以愚民手段減少大家對推普滅粵嘅警覺。

推行普教中純粹出於政治考慮

由普教中嘅失敗到中普融合嘅推行,可以睇得出成個計劃嘅目標唔係為咗「提升學童語文能力」,跟本就係為推行普教中而實施。唔係點解明知會降低中文能力,都硬係要繼續推行,仲要將普教中嘅失敗歸咎到師資同校園環境上,一廂情願咁要佢哋查找不足?所以由普教中再到中普融合嘅成個過程,本身就係「為推普教中而推普教中」。

普教中對香港嘅教學語言進行改革,教育改革本身就係一個政治行為,而普教中係為推行普教中而設,亦即係「政治行為」係為「政治行為」而推行。簡單來講,就即係「普教中」與及相關政策(包括如今嘅中普融合),根本完全無關教育,純粹只係一個政治行為,更有可能係一個為咗要達成某種政治目的而去推動嘅政策。

歸根究底,普教中嘅本質唔係唔係為咗學童着想而進行嘅教育改革,明明用普教中學習嘅學童中文差咗,都仲要加碼繼續倒錢入去,所以話「推行普教中唔係一個政治任務」真係呃人。為咗完成政治任務,到底要浪費幾多納稅人嘅血汗錢,埋沒幾多本地教育人才嘅就業機會同仕途,犧牲幾多學童嘅教育質素?又,稚子何辜,點解佢哋教育質素嘅隱定,同校園生活嘅和諧,要俾一個對佢哋學習中文冇好處嘅政治任務破壞?請大家睜開雪亮嘅眼睛,評一評理,到底係基於客觀事實,發起一人一信要求教育局撤回所有普教中政策偏激,定係明知普教中危害學生語文能力,都要「為推普教中而推普教中」,而不惜一切代價將普教中推行到底更加偏激?

港語學

                           

作者介紹

Leave a Reply

avatar
  訂閱  
提示