由建制派人士成立嘅「關愛共融助更生協會」尋日喺創會典禮上，發布斥資過百萬嘅遊戲「道盡江湖」VR遊戲。協會將會同懲教署合作，提供畀懲教院所嘅年輕在囚者喺監獄玩，期望透過道家思想導人向善。

遊戲故事主角「王從山」本來係惡霸，受到天罰轉生，變成人人憎惡嘅樣衰。玩家需要喺遊戲入邊完成三大任務，最終就可以獲賜正常人外貌。遊戲重點係帶出中華文化中忠、孝、信、義，同時都道出「人要擁有一技之長」嘅重要性。

人稱「紙紮大王」嘅協會主席夏中建強調，故事大綱係依賴道家理念而創作，希望帶出「福報」嘅宗旨，絕對唔係影射在囚者醜陋。佢又話，以前去懲教院所辦紙紮工作坊時，見到好多在囚者年紀好細，年少無知犯法，要長時間受牢獄之苦，睇見都好心悒，於是決定透過道家思想，再配合新穎嘅VR遊戲技術，幫助在囚者透過遊戲建立正向思維，改過自新。遲啲會安排喺學校畀學生玩，每鋪大約玩十幾分鐘。

該遊戲會喺今年7月至8月面世，屆時由懲教署安排喺不同院所推出。懲教署署長黃國興致辭時表示話，近年有唔少激進思想、暴力傾向的違法者被判監。懲教署因應推出多項計劃，好高興熱心人士成立協會，配合懲教署提供道德教育，幫助佢哋去除激進、暴力思維，矯正價值觀。

呢次都唔係第一次懲教署提供VR場景俾年輕在囚人士。早喺2020年，懲教署已經開始試行「VR（虛擬實境）歷史教學」、「歷史電競」，希望喺獄中俾在囚人士感受到中華文化嘅偉大。

#懲教署 #VR遊戲 #在囚人士 #暴動罪 #廣東話 #港語學