警隊招募組宣布，將會喺周五（5日）起，調整體重身高、視力及中英文水平等三項入職要求。如果投考者未有中學文憑試中英文Level 2成績，警隊會增設「警員中/英文筆試」，只喺約60題嘅選擇題筆試合格，就會當應考者具DSE中英文考獲Level 2成績，即入職嘅最低門檻。
此外警方亦取消投考者身高及體重最低要求，同各個紀律部隊看齊；亦都投考者佩戴眼鏡或隱形眼鏡進行視力測試。警方強調：「調整入職要求不等同降低能力要求，投考者仍然要經過嚴格遴選，進入學堂後會接受訓練，必定係具備體質同能力嘅執法者。」
「警員中/英文筆試」分為「中文運用」同「英文運用」兩份試卷，各設50至60條選擇題，答題時間為60分鐘，通過筆試就會當佢哋有DSE中、英文科第二級成績，並且「永久有效」。雖然「警員中/英文筆試」只設有選擇題，但警方強調，試卷係由公務局事務局轄下認可嘅出卷員設計，亦參考咗一直沿用嘅督察級語文試卷，筆試設有閱讀理解、語文運用同埋錯別字等，相信可以揀選符合語文能力嘅警員。
