老作中醫謠言呃Like 要落地獄

古代傳說,喺刀山地獄,牛頭馬面會將啲造假藥嘅人由高處掟落嚟,等刀片穿腸破肚。呢啲人為咗錢財而誤世殺人,殘害百姓,輕則服之無效,延誤病情;重則釀成毒禍,害人性命。天理循環,應有此報。

現今資訊發達,內容農場成風。為咗製造內容,老作故仔呃人含淚畀Like,經已見怪不怪。唔知幾時開始,呢啲造謠者開始轉向醫學埋手。佢地利用長輩信賴老中醫嘅心態,專偽托「老中醫」名號,用「歌訣」、「口訣」欺哄老弱婦兒,更高聲呼籲「分享」、「廣傳」,陷市民於不義。

呢啲言論都有以下特徵:

1. 鍾意自稱「老中醫」,增加說服力
2. 鼓吹「有病唔睇醫生」嘅思想,強調疾病可以不就醫而痊癒
3. 唔講求診斷、辨證論治
4. 人物、言論、醫案毫無根據
5. 作者匿名或來歷不明

謠言又可以分為推介型、總結型、歌訣型三種。

推介型:弄虛作假

推介型就係推介集中一種疾病嘅治療方法,例如「敷熱水袋」:

「請幫手傳開。香港現在感冒流行,朋友傳來簡單治療法和你們分享:王老中醫推薦的治療感冒方法。差不多有10次感冒,每一次都用熱水袋來救場,沒有一次感冒過。將熱水袋敷上以後,寒邪是由太陽經侵入項背引起,敷上自然就不會感冒了。如果去看中醫,可能會開桂枝湯。其實,根本就不用吃藥。也不要等待感冒的7天痊癒期。這種方法治療感冒,又不用花錢,效果又立杆見影。曾經和一位同仁堂的做堂老中醫交流過這種方法。推薦給別人使用過,敷了一個星期,很劇烈的咳嗽也好了。」

杜撰者拋吓書包,虛構人物,例如文中「王老中醫」、「太陽經」、「桂枝湯」、「7天痊癒期」、「同仁堂」等字眼,正正就係糖衣毒藥;好似好有理論,實則亂嗡廿四。中醫講求辨證論治,感冒有寒熱、六經之分,豈會見病就謂「寒邪入侵太陽經」,貼個熱水袋就算?騙徒更加詆毀中醫,話「中醫可能會開方……但根本不用吃藥」,誣諂醫師治無病之人圖利。造假、述錯、蜚語,呢啲人唔落地獄,邊個落地獄?

地獄指數:★★★★★

總結型:充大頭鬼

內容農場最常見嘅文體,將資料概括為「老中醫告訴你十大養生的秘密」或「老中醫不願告訴你的十大養生秘密」。標題用上中醫或老中醫,但同樣往往都係無名無姓,毫無根據。呢啲文章無特定內容,因為佢地可以搵任何「健康冷知識」安插成中醫所言,然後湊數造成文章。多數以養生方法、食療為主,無良者則會將偏方、藥方編入文章,導致誤治、害命。

地獄指數:★★★★✩

歌謠型:糖衣毒藥

歌謠型則係假扮中醫歌訣,將「知識」滲入其中,例如「番茄補血助容顏,蘋果止瀉營養高」。因為係歌訣嘅形式,佢可以拋出一句句治法、藥物用途而不加解釋。由其歌訣宣揚「有病唔睇醫生」嘅思想,例如教人感冒肚痛,食生薑粥了事。一啲不中不西嘅概念,「營養高」、「抑癌症」、「含碘去瘀」,都會硬塞喺歌訣之中。偏偏長輩最鍾意呢種形式成日視為珍貴心法,互相分享,咁先防不勝防,殺人於無形。

地獄指數:★★★★★

老作中醫害人之眾,於假藥更甚。內容農場之多,啲「農夫」又夠無恥,要管制佢地,決不可能。遏止歪風,除咗自己唔好再傳播之外,凡見親友傳播,都必須喝止,以免佢地作孽而不自知。咁咩資訊最可靠?起碼要係註冊中醫師有名有姓嘅文章,同時有疑問都要去註冊中醫師查詢。如果想接收啲正確嘅中醫資訊,個人推薦Facebook專頁懸壺善學堂,仁心敢言,值得一讚(like)。