作者：陳琰

以前我好少會儲野，因為一直都冇呢個習慣，我呢份人中意睇書、聽歌、打波，但係對儲野真係冇乜自覺。有人會儲郵票，我要寫信時先會買郵票；有人中意儲舊銀紙，我就話有錢當然要洗左先。只不過呢排無意中得到幾個女皇頭銀仔，我無端端竟然生出想儲起佢地既諗頭。

呢件事真係夠晒莫名奇妙，我嘗試去猜度自己，發現除左係自己一貫既懷舊情結作怪外，更多左一種回應當下既欲望──當下香港咩狀況？心照啦。呢種回應算唔算係戀殖呢？未必係，我唔係香港土生土長既人，我六歲落黎香港，好彩融合得快──其實融合呢個字眼係咪好準確呢？我自己覺得搬到人地地方住，要落地生根，自然而然就必須守人地規矩。一路以黎，我都以香港人自居，對於我未經歷過既香港殖民年代，有我老竇一直無意中做既口述歷史黎補遺。

我老竇六十年代偷渡黎香港，係佢既年代，碟頭飯八毫子一碟，新蒲崗住板間房見證租客同包租婆個女暗通款曲，係黃金戲院打工獲老闆賞識到後來幫呂志和做事，佢既歷史離不開衣食住行，更加離不開我手上既女皇頭銀仔。三個女皇頭分別係七九同八零年鑄造，係我搭車買野時無意中找番黎，熟悉既洋紫荊變成一個頭戴環飾既女人，佢好似想對我講一啲野，定其實係我想咁呢？

不曾熟悉既女皇，遠在萬里方外；曾擁有過既歲月，係銀色表面反光既一刻睇清睇楚，呢段歷史對我黎講到底有咩意義？我知道呢段歷史唔係純然地好，佢有黑暗醜惡既一面，聽老竇講過唔少；好似六七暴動個陣，佢係新蒲崗打工，明明唔係暴徒都照俾警察毆左幾棍。但係拎呢段歷史同今天做對照，我只會覺得可悲，似乎今日香港墮落得太快喇，跌到最低，令人喪失信心。以前我未曾想像過有一日要面對咁多個警察，仲要係凶神惡煞，殺人父母咁樣。我係彌敦道同龍和道個晚見得太多呢種面目，我唔打得，我都會驚，更可怕既係呢種恐怖會植入記憶之中，例如七月二號晚我係遮打聲援左成晚，當我再次黎到遮打道個時，當夜記憶同眼前畫面不禁重疊起黎。我驚訝自己竟然會有呢種時刻，第一次被怵目驚心既記憶佔據心靈，以前我都會有呢啲時刻，但個啲係快樂既記憶。

記憶同歷史互相追逐，玩緊一場令人時而痛心，時而窩心既遊戲。女皇，你見到依家香港既狀況嗎？你有咩感覺？你願意用我既眼睛代行觀察嗎？遮打革命以黎我固然見識唔少醜惡既嘴臉，不過另一方面我都俾好多朋友既支援，同佔領區見證既好人好事感動，或者我地未必係完全墮落得晒，某啲價值崩壞既同時會有新既價值替代，或重建往日一啲被忽視既價值。
擲個公字，如果係女皇頭面我就寫呢篇文出黎。我總希望三個沉默既銀仔會俾到答案我，不過答案只有自己先至會尋找到。

作品為第一屆廣東話徵文比賽季軍