塊魂係呢個世界上最好玩嘅遊戲。由PS2時代遇到呢隻Game開始，至今我仍然搵唔到佢嘅對手。我細個一放學就碌《塊魂》，坐車都回味緊尋日打嘅關卡，幾咁別具匠心、引人發笑。朋友搵我同佢打真三國無雙４，我總係嗤之以鼻，因為我覺得佢根本就唔明咩遊戲。當年唔係真三就係GTA，割草式嘅殺戮令人厭倦，而我天生鍾意玩創意爆棚嘅遊戲——好似塊魂咁，將一舊擦紙膠咁大嘅波波，碌過高山大海，碾過高廈人群，以至吞食天地，呢啲先叫創意！只有塊魂，無論洗腦嘅魔音，抑或腦洞大開嘅設定——「完美」，呢兩隻字伴隨住佢，登上我嘅神壇，Ten years，NO ONE CAN CHALLENGE。

你可以諗到我對呢隻Game係幾咁鍾意。所以自我有經濟能力買Game開始，我不時都會Google「塊魂 新作」，但聽到嘅消息都係出手機遊戲，我嘅心都沉咗一半；因為你都知而家舊酒新瓶手機遊戲，同一隻課金嘅白痴game無分別。果然，Bandai真係無恥到可以出一隻《我的塊魂點擊》（Tap My Katamari），成隻game 毫無內容，只係狂撳個mon，睇住王子碌千篇一律嘅文具，直頭你忍唔住要課金。我認係痴線擁躉，居然都撳咗半日，終於頂唔順剷Game。從此我同自己講，如果只係手機遊戲，唔係正經主機出品嘅《塊魂》，掂都唔好掂，以免失望。

所以當知道BANDAI會重出《塊魂Encore》，我幾咁振奮！為免中伏，我即刻Down咗個試玩版落部Switch。Demo係好足秤，足足5分鐘畀你任玩。望住遊戲開場嗰張日式暖檯同十幾年前一模一樣，我就好似東方博士跟住粒星，望到聖嬰個馬槽咁，爭啲流出兩行清淚！我係好感動，一路碌一路喺度諗：「一切好似以前咁美好」。仲要係登陸Switch，呢部劃時代嘅主機；仲宣稱加入體感控制。思緒澎湃洶湧，我就好似博士預見新生王要拯救世界咁，係啦，超越《塊魂》，惟有《塊魂》，遊戲界救世主即將降生。

於是我即刻衝落樓，買咗早期購入特典（送國王／王子貼紙，而貼紙竟然成為最後唯一抵讚嘅嘢。）我仲唔識死，呼朋喚友嚟到我屋企試機，唔知道即將迎接，機齡廿幾年嚟最大嘅失望。

二人模式　形同虛設

開機之前，我一路滔滔不絕咁講隻Game幾咁好玩，聽到朋友都流晒口水。呢隻Game其中一隻賣點係「二人模式」，咁我諗掂啦，就算只係100% 復刻PS2版《塊魂》，我覺得可以攜手通關已經值回票價。點知入到去，我同主角王子（右下角綠色生物）行咗成個地球，走入每個關卡，都開唔到二人Mode。Google一番，方知中伏。

我search 「Katamari 2 player」，第一個結果已經令我心酸。有網友開post問「Is it 2-Player?」，佢同我一樣都搵唔到點開。喺嗰抽討論嘅結論係：「你行入粒太空磨菇，畫面會分割兩邊，比你哋喺個小空間對戰。呢個就係我見過惟一嘅二人模式喇。」

入到所謂「小空間」，居然就係一個圓圈嘅核突窿，裝住你可以碌嘅小物件，然後你就沿住個圓圈走，直到你大舊到可以碌走你嘅對手。無錯，成個過程非常無聊。佢甚至懶得喺核突窿中放入任何生物，一隻老鼠以至一個相撲手都唔擺，以至成個場由色調到玩法都係一潭死水，毫無變化。

我真係唔明，標榜分享手掣、與民同樂嘅Switch，整個雙人模式居然可以衰過PS2。而家係2019，係連你玩個《Mario》，2P最少都可以做頂小紅帽飛嚟飛去，合力通關！除咗冇心出品，趕住呃Fans錢，仲有乜嘢理由唔可以完善埋二人模式？去到呢一刻，我仲自欺欺人：唔緊要啦，《Zelda》得一條友玩，咪又係一隻好game！之後我就發現，攞《Zelda》同《塊魂Encore》比，絕對係侮辱緊《Zelda》。

粗製濫造　玩法單調

第一關係同初代一樣，一間和風嘅屋企。頭幾關都算唔錯嘅，好有初初玩塊魂嘅感覺，由八爪魚丸咁大，碌到出屋企，再碌到出商店街。但點知之後關關都幾乎一樣。只不過目標越嚟越大，去到最後一關就碌到最大，碌埋地殼版塊。

其他旁支關卡則有唔同主體，例如處女座碌少女（…），金牛座碌金牛。雖然物件唔同，但玩得耐就會睇得出場景一樣，別無生意。

幅地圖都好奇怪，生氣勃勃嘅遊戲居然用死氣勃勃嘅宇宙藍。每個關卡外觀一模一樣，只能話Hea做至極。

 

沒有故事　哪有靈魂？

最後我想講，塊魂，豈止於大？初代唔單止係越碌越大，仲有故事得多。穿插於關卡之間，國王成長與愛情之路嘅動畫，王子收集木條堆火球，去到夜晚民眾圍住跳營火舞嘅感動，收集螢火蟲幫窮學生讀書，碌食物幫相撲手成長……呢啲故事就係潛移默化緊每個小朋友，塊魂嗰種精神——積小才能成多，滴水可以穿石。

行文至此，我已經問Friend借咗部ps2，將初代塊魂通關一次。因為呢隻《塊魂Encore》實在太噁心。我已經唔會再相信Bandai，直到有機會試玩到完整版，真係似返少少樣，我先會考慮再入手。