日本德國加入廣東話賀年陣營!一次過睇晒日德英法美加臺

今個2019,各國領事都爭相用廣東話向香港市民拜年。英美法加先拔頭籌,前幾日已經出片出動畫。德國、日本亦不甘後人,尋日又喺Facebook拜年。

日式萌化 豬仔一齊拜年

日本總領事和田大使特意邀請從鹿兒島遠道訪港小豬吉祥物「ぐりぶー(Greboo)」和「さくら(Sakura)」,同大家一齊拜年!雖然全片只有短短30秒,但不愧為都要過新年嘅日本:和田大使做咗其他大使無做,最重要嘅嘢,就係派——利——是!

德國隨俗 入屋拜年打麻雀

德國總領事林文禮同夫人都用廣東話祝大家「豬籠入水」!佢仲依照農曆新年傳統,買晒賀年禮物,拜訪咗本地朋友屋企。佢未學晒廣東話,先學識點「食糊」喇!

 

【有片】「海外很多僑胞講廣東話!」蔡英文向全球華人用粵語拜年

前日晚,中華民國蔡英文總統透過Facebook向全球華人祝賀。

蔡英文今年首次以廣東話、潮州話向海外華人朋友問候新年快樂。

佢特別提到:「海外有很多僑胞講的是廣東話。」然後用似乎係初學嘅廣東話講:「新年快樂!」

同時蔡英文都許下新年三願:祝福海內外華人都可以過民主生活、好好享受自由、年年發財賺大錢。

英國領事 親民過節

英國領事館訪問駐港同事,睇下佢哋點喺香港務度過農曆新年。今年係副領事柏德謙履新後第一個農曆新年。佢入鄉隨俗,去中環石板街買利是封及新年裝飾迎豬年!

法式創意 召喚關公拿玻崙

同樣首年過新年嘅法國駐港澳總領事官明遠(Mr. Alexandre Giorgini),都一樣喺影片中帶大家去辦年貨。但喺途中,佢俾關公門神畫吸引,途人向佢介紹呢個係中國古代大將軍,佢都向對方介紹法國亦有位做咗皇帝拿破崙大將軍。

美國動畫 炮製短劇賀年

美國駐港澳總領事唐偉康(Kurt Tong)偕太太Mika Marumoto博士向市民拜年,兩個全程都用廣東話對答,介紹「土豬年」曆法。入面整埋動畫,引入領事館在港百幾年歷史。

領事變廚師 加國煮豬肉夠搞笑

加拿大拿駐港澳總領事南傑瑞(Jeff Nankivell)化身廚師大顯身手,介紹由加拿大進口豬肉製品,並即席炮製給同事品嚐。當南傑瑞端拎豬肉畀同事品嚐時,有同事向他表示佢食齋,佢隨即話:「無問題!加拿大支持多元文化,我哋有素豬肉㗎」。